Të shtëna me armë janë shënuar në një banesë në një fshat të Krujës, ku dhëndri i shtëpisë, në gjendje të dehur, ka qëlluar me armë zjarri. Nga të shtënat nuk ka të plagosur, ndërsa autori u arrestua.
Ngjarja
Një ngjarje që mund të ishte kthyer në tragjedi është shënuar në fshatin Bruz Zall të Krujës.
“Shërbimet e Komisariatit të Policisë Krujë, pas marrjes së njoftimit se fshatin Bruz Zall-Krujë, një shtetas po kërcënonte me armë zjarri bashkëshorten e tij dhe familjarët e saj, menjëherë kanë mbërritur në adresën e dhënë dhe kanë bërë të mundur neutralizimin dhe arrestimin në flagrancë të shtetasit Arben Hoxha, 41 vjeç, banues në fshatin Rranzë-Krujë”, njoftoi këtë të Enjte policia.
“Arrestimi i tij u bë pasi për motive të dobëta, ka shkuar në banesën e vjehrrit të tij ku ndodhej dhe bashkëshortja e shtetasit Arben Hoxha, e cila ishte pajisur me urdhër-mbrojtje. Arben Hoxha, në gjendje të dehur, i ka kërcënuar me armë zjarri pistoletë, duke qëlluar në ajër dhe drejtime të ndryshme, duke rrezikuar jetën e tyre”, shtuan të njëjtat burime.
Në cilësinë e provës materiale u sekuestrua 1 armë zjarri pistoletë, 1 krëhër dhe 4 fishekë.
Ndaj të arrestuarit rëndojnë akuzat për veprat penale “Kanosje serioze për jetën”, “”Armëmbajtje pa leje” dhe “Dhunë në familje”.
