Pas titullit kampion të fituar pas 27 vjetëve mungesë, Teuta humb liderin e skuadrës. Në një merkato aktive, me 9 lojtarë kampionë të larguar dhe 9 afrime të reja, bregdetarët nuk do të kenë më as shërbimet e kapitenit Renato Arapi. 35-vjeçari vendosi të mbyllë karrierën në futbollin e luajtur, pasi arriti të kthente kurorën e kampionit te skuadra e vendlindjes.
Pas tre sezoneve shumë të suksesshme me Teutën, mbrojtësi me eksperiencë njoftoi tërheqjen. Konfirmimi u dha edhe nga klubi, që falënderoi përzemërsisht kapitenin. Numri 3 ishte shtylla kryesore e bluve, prej rikthimit në Niko Dovana në vitin 2019, ku kishte premtuar se misioni i tij ishte fitimi i trofeve.
Renato Arapi dhe Teuta fituan fillimisht Kupën e Shqipërisë, duke festuar në mënyrën më të mirë 100-vjetorin e klubit. Më pas suksesi vijoi me trofeun e Superkupës, për të kulmuar në festën e shumëpritur të 26 majit të kaluar, me ngritjen e titullit kampion. Largimi i mbrojtësit është cilësuar si një mirupafshim dhe jo një lamtumirë nga klubi, që ka lënë të hapura dyert për një bashkëpunim në të ardhmen me ish-kapitenin.
