Epidemiologu Ilir Alimehmeti shprehet se variantet e reja të koronavirusit janë më të transmetueshme, por më pak vdekjeprurëse.
Në një reagim në rrjetet sociale, mjeku paraqet të dhëna lidhur me koronavirusin nga autoritetet e Izraeilit, ndërsa konkludon se variantet e çdo virusit kanë tendencën të bëhen gjithmonë e më bashkëjetues me njeriun.
Reagimi
“Një vit më parë kuptohet që flisnim për variantit D614G, i cili zëvendësoi që në Mars 2020 variantin origjinal Ëuhan-1. Duhen gjithmonë disa muaj përpara se të kryhen e publikohen studimet, por edhe pse e vërteta vonon, ajo del gjithmonë në sipërfaqe. Tani që erdhi gushti i vitit 2021 kemi njohuri më të plotë për varianti B.1.1.7, të njohur ndryshe si varianti Britanik e më pas varianti Alfa. Vetëm dje u prepublikuan të dhënat e Izraelit mbi shkallën e vdekshmërisë së rasteve nga varianti Alfa. Studiuesit e Kolegjit Sapir dhe të Universitetit Ben-Gurion (Izrael) prepublikuan dje, më 18 gusht 2021, të dhënat e të gjithë popullatës së Izraelit duke filluar që nga data 1 mars 2020 e deri më 28 shkurt 2021, periudhë në të cilën nuk ka luajtur efekt ende vaksinimi”, shkruan Alimehmeti në FB.
Më tej, ai publikon dhe rezultatet:
- Piku i vdekshmërisë së rasteve (CFR) është në maj 2020.
- Vdekshmëria e rasteve (CFR) ishte më e ulët më pas.
- Vdekshmëria bruto në shifra absolute ishte më e lartë, pasi numri i të infektuarve ishte shumë më i madh.
- CFR-ja kumulative ra gradualisht nga:
- 1.25% në korrik 2020, deri në 0.74% në Mars 2021.
Autorët, sqaron ai, dalin në përfundimet e mëposhtme:
- Megjithëse vdekshmëria bruto ishte më e lartë me variantin alfa (sepse infektoheshin më shumë njerëz), përqindja e vdekshmërisë së rasteve (CRF) ishte më e ulët.
- Një mekanizëm i qartë për këtë skenar është DALJA E NJË VARIANTI TË RI DOMINUES, I CILI ËSHTË MË INFEKTUES POR JO MË VDEKJEPRURËS, MADJE MUND TË JETË EDHE VARIANT MË PAK VDEKJEPRURËS.
“Mos të harrojmë që tashmë varianti Alfa (britanik) është zëvendësuar nga varianti Delta (indian), i cili është qartësisht më i transmetueshëm dhe në analizat ad interim duket më pak vdekjeprurës me CFR 0.3%. Le t’i japim disa muaj kohë shkencës, e më pas ajo do të na vërtetojë sërish që variantet e çdo virusit kanë tendencën të bëhen gjithmonë e më bashkëjetues me njeriun. Për vërtetimin e fakteve, shkenca kërkon gjithnjë kohën e saj, por në fund rezultatet janë krejtësisht të pritshme bazuar mbi mekanizmat virologjike të njohura deri më sot”, përfundon mjeku.
