Ambasadori rus në Afganistan e lavdëroi sjelljen e talebanëve e tha se grupi, të cilin Moska zyrtarisht ende e konsideron organizatë terroriste, e bëri Kabulin në 24 orët e para më të sigurtë nga sa ka qenë me autoritetet e mëparshme.
Komentet e ambasadorit Dmitry Zhirnov, thotë Reuters, reflektojnë një përpjekje aspak të fshehtë të Rusisë për të thelluar marrëdhëniet e saj me talebanët ndërkohë që shmang, të paktën për momentin, njohjen e grupit islamist si sundimtarin legjitim të një vendi të cilin Moska vetë u përpoq por dështoi ta kontrollonte përpara se Bashkimi Sovjetik të tërhiqte forcat e tij të fundit prej andej në 1989.
Rusia kërkon të sigurohet që paqëndrueshmëria e Afganistanit të mos përhapet në Azinë Qendrore, pjesë e ish -Bashkimit Sovjetik që ajo e konsideron si oborrin e pasëm të shtëpisë së vet, dhe të mos kthehet në një platformë lëshimi për grupe të tjera ekstremiste islamike. Ashtu si vende të tjera, edhe ajo shprehet e befasuar me shpejtësinë me të cilën talebanët morën kontrollin e vendit teksa forcat e SHBA-së ende përpiqeshin të evakuonin qytetarët amerikanë.
Duke folur për stacionin radiofonik Ekho Moskvy, Zhirnov u shpreh se i kishte lënë mbresë sjellja e talebanëve dhe qasjen e tyre të deritanishme e përshkroi si diçka “të mirë, pozitive dhe të ngjashme me biznesin”. “Situata është paqësore, gjithçka në qytet është qetësuar. Gjendja tani në Kabul është më e mirë sesa ishte me presidentin Ashraf Ghani,” ishte komenti i tij.
