Një ngjarje e rëndë është zbuluar këtë të Mërkurë në Shkodër, ku sipas policisë, një i moshuar ka qëlluar për vdekje me armë zjarri bashkëshorten. Më pas, ka vrarë veten. Viktimat janë Fadil dhe Sanije Bandulla.
Ngjarja ka ndodhur në banesën e çiftit në lagjen “Ahmet Haxhia”. Sipas policisë, dyshohet se krimi ka ndodhur para disa ditësh, por është zbuluar vetëm këtë të Mërkurë.
“Dyshohet se shtetasi Fadil Bandulla, 79 vjeç, ka vrarë me armë zjarri në banesë bashkëshorten e tij shtetasen Sanije Bandulla, 83 vjeçe dhe më pas ka vrarë veten. Në vendngjarje është gjetur dhe sekuestruar në cilësinë e provës materiale arma e zjarrit automatik me të cilën dyshohet se shtetasi Fadil Bandulla ka vrarë bashkëshorten dhe më pas veten”, njoftoi policia.
Grupi hetimor, nën drejtimin e Prokurorisë Shkodër, vijon punën për sqarimin e plotë të rrethanave të kësaj ngjarjeje, shtuan të njëjtat burime.
