Bashkia e Korçës ka reaguar në lidhje me debatin për mbajtjen e koncertit të Goran Bregoviç, gjatë festës së birrës më 22 gusht.
Ajo që bie në sy në reagimin e Bashkisë është pozicionimi si një institucion viktimë apo duke e trajtuar qytetin e Korçës si një viktimë, ndërkohë që në çdo reagim publik, askush nuk ka vënë në dyshim vlerat që ky qytet mbart, apo mikpritjen, kulturën dhe traditën.
Pa qenë në gjendje të japë qoftë edhe një argument të vetëm sepse u insistua në pjesëmarrjen e Goran Bregovic në koncert, duke mos pasur kurajon për t’iu përgjigjur apelit të familjarëve të të zhdukurve në Kosovë, madje duke provokuar me deklaratat e nënkryetares së Bashkisë, e cila shprehej se “shqiptarët nuk janë aq trima”, Bashkia e Korçës, të paktën duhej të distancohej nga qëndrime të tilla, dhe të jepte një sqarim realisht në përputhje me atv që i është kërkuar.
“Korcarët me të drejtë janë krenarë e të vetëdijshëm për atë që Korça i ka dhënë e vazhdon t’i japë Shqipërisë.
Qe nga fjalet e himnit të flamurit, mësonjetoren e parë të shkronjave shqipe, Bandën Vatra, Korin Lira, filantropët, patriotët dhe intelektualet e shquar që edhe në mërgim punuan deri sa mbyllën sytë për Korçën dhe Shqipërinë.
Përpjekjet e ditëve të fundit për të demtuar imazhin e Korcës dhe korcarëve janë thjesht pjesë e një skenari që nxit përcarje e konflikt, për të trazuar ujërat e për të nxehur gjakrat me të pabëra e të pathëna”, thuhet në një reagim të Bashkisë së Korçës, që me sa duket jo s’ka lidhje me reagimet për Bregovic, por tregon për rolin e viktimës që kanë zgjedhur të bëjnë drejtuesit e kësaj Bashkie.
