Prej ditësh zhvillohet një debat mbi performancën e Goran Bregoviç në festën e birrës në Korçë.
Ftesa drejtuar këngëtarit që konsiderohet si frymëzues i masakrave serbe në Kosovë ka prodhuar reagime të forta në Shqipëri dhe Kosovë.
Akademiku Artan Fuga ka edhe një përgjigje për të gjithë kritikët.
Në një postim në rrjetet sociale, Fuga shkruan se “Audienca është mbret”, dhe se ç’bëhet me performancën e Bregoviç, atë e di audienca në Korçë, kush e pëlqen e pëlqen, kush nuk e pëlqen nuk e pëlqen.
“Nëse Shqipëria, nuk pranon asnjë komunikim diplomatik, kulturor, ekonomik, tregtar, etj., as me Maqedoninë e Veriut, hmmmmmm maqedonasit, as me Greqinë hmmmmmm grekët, as me Malin e Zi hmmmmmm malazezët, as me Serbët, hmmmm serbët, hajde kthehemi në një kazermë, izolohemi, vishemi me rroba zborri, dhe fillojmë të kavërdisemi me vajin tonë!
Ne na duhet të ruajmë identitetin, të bashkëpunojmë për njohjen e Kosovës si element prioritar, të jemi faktor paqeje me të gjithë dhe të integrohemi në Europë.
Kurse se ç’bëhet me atë Bregoviçin, atë e di audienca në Korçë, kush e pëlqen e pëlqen, kush nuk e pëlqen nuk e pëlqen.
Audienca është mbret!”-shkruan Artan Fuga.
