Deputetja e zgjedhur e PD, Albana Vokshi, ka reaguar në rrjetet sociale, lidhur me situatën e pandemisë në vend, ndërsa shkruan se të dhënat e INSTAT nxorën zbuluar propagandën e Qeverisë dhe dështimin e Edi Ramës.
Vokshi shkruan se Shqipëria ka numrin më të lartë të vdekjeve në Europë që nga fillimi i pandemisë, 10 mijë vdekje më shumë.
“Dështimin e Edi Ramës me pandeminë e paguan qytetarët e thjeshtë, të cilët mbetën të pambrojtur ndërkohë që përgjigjja e vetme që qeveria kishte, ishte si përherë propaganda.
Teksa qytetarët vuanin dhe ekonomia lëngonte, Rama nuk hoqi asnjëherë dorë nga mashtrimet dhe gënjeshtrat, nuk hoqi dorë as nga shpenzimet e majme për klientët e tij, nuk hoqi dorë nga koncesionet korruptive dhe nga tenderat sekretë në kohë fatkeqësie”, shkruan Vokshi.
Sipas saj, Shqipëria u rendit:
– e fundit në Europë për numrin e testimeve,
– e fundit në Europë për numrin e mjekëve për banorë,
– e fundit në Europë për ndihmën ekonomike dhe
– e para në Europë për numrin e jetëve të humbura në raport me popullsinë.
Deputetja demokrate thekson se Rama refuzoi planin e PD me 5 pika, sepse ai kishte planin e tij për të plaçkitur taksat e shqiptarëve edhe në kohë pandemie.
“Atë që sot zbulon INSTAT-i, qytetarët e kanë jetuar dhe vuajtur në lëkurën e tyre.
Këto janë pasojat e pashmangshme të sundimit të një pakice që ka braktisur shqiptarët dhe punon vetëm për veten dhe klientët e saj”, shprehet Vokshi.
