Virgil Van Dijk ka lënë pas dëmtimin që e la jashtë sezonin e kaluar dhe është gati të rikthehet në formacionin e Jurgen Klopp.
Pavarësisht dëmtimit të rëndë, drejtuesit e Liverpool besojnë verbërisht te Van Dijk dhe për këtë arsye i kanë rinovuar kontratën, duke e zgjatur deri në verën e 2025-ës, kohë kur holandezi do të jetë plot 34 vjeç.
Lajmin e dha vetë klubi anglez, që ndër të tjera thekson se pas rinovimit me portierin brazilian Alisson dhe mbrojtësit Fabinho e Trenk Alexander-Arnold, tashmë blindohet një tjetër titullar i formacionit të Klopp, për më tepër një lider i mbrojtjes dhe skuadrës së Liverpool.
Mjaft i lumtur me firmën mbi kontratën e re u shfaq edhe mbrojtësi 30-vjeçar holandez, i cili deklaroi se ka lënë pas krahëve dëmtimin dhe mezi pret t’i shpërblejë besimin klubit me paraqitjet në fushën e lojës.
“Që ditën e parë kur erdha në Liverpool, ndjeva aq shumë vlerësim nga tifozët, shokët e skuadrës dhe stafi, saqë kuptova se do të qëndroja gjatë këtu dhe do të bëhesha pjesë e rëndësishme e klubit. Jam shumë i lumtur që do të mund të vazhdojmë gjithë punë e mirë të bërë deri tani me Liverpool. Kam luajtur disa miqësore që më kanë ndihmuar të rigjej ritmin e ndeshjes, ndaj besoj se jam gati për fundjavën, por vendimi i takon trajnerit. Mezi pres të shpërblej në fushë besimin e klubit”, deklaroi mbrojtësi holandez.