Rëndohet bilanci i humbjes së jetëve njerëzore si pasojë e përmbytjeve në Turqi. Mediat vendase raportojnë për të paktën 17 persona që kanë humbur jetën.
Përmbytjet goditën provincat veriore të Turqisë, ndërsa autoritetet njoftuan se disa nga vatrat e zjarrit që përfshinë bregdetin jugor për dy javë janë vënë tashmë nën kontroll.
Nga raportimet mësohet se 15 persona humbën jetën në provincën Kastamonu dhe dy të tjerë në Sinop.
Më shumë se 1300 njerëz janë evakuuar nga zonat e prekura, disa me helikopterë dhe anije. Mbi 320 fshatra kanë mbetur pa energji elektrike, ndërkohë intensiteti i shirave të rrëmbyeshëm në zonë pritet të ulet gjatë ditës së sotme.
