Kthehen sërish në vëmendjen mediatike dyshimet se burimi i COVID-19 ishte laboratori i Wuhanit në Kinë.
Dyshimet vijnë të përforcuara kur dalin nga goja e Peter Ben Embarek, kreu i ekipit të hetuesve të OBSH-së që kryen hetime të terren në Kinë në fillim të këtij viti.
Mjaft interesante është hipoteza e hedhur prej tij në një dokumentar të transmetuar në televizionin publik danez TV2.
“Një punonjës i laboratorit u infektua, teksa punonte në një shpellë me lakuriqë nate ku grumbullonte kampionë. Një skenar i tillë që mund të lidhet me një rrjedhje nga laboratori, mund t’i përshtatet hipotezës tonë të transmetimit direkt të virusit nga lakuriqët tek njeriu. Është një hipotezë që e konsiderojmë të mundshme”.
Megjithatë, Pekini zyrtar hodhi poshtë këto pretendime. Zyrtarët kinezë thanë për të përditshmen vendase në anglisht Global Times se studimi i OBSH-së është i bazuar në evidenca jo-shkencore. Ata thonë se nëse ka dyshime se virusi mund të ketë dalë nga laboratorët, janë ata në Shtetet e Bashkuara që duhet të hapin dyert për hetime.
Kina akuzon Uashingtonin se po nxit politizimin e çështjes. I pari që hodhi dyshime mbi origjinën laboratorike nga Wuhani të COVID-19ës ishte ish-presidenti amerikan Donald Tramp, i cili u përball me kritika të ashpra nga kundërshtarët demokratë. Megjithatë, në fillim të këtij viti, pasardhësi i tij demokrat Biden kërkoi që hetimet të mos e përjashtojnë këtë pistë, duke iu bazuar tek dyshimet e arsyeshme nga disa raporte të shërbimeve ushtarake të zbulimit amerikan.
