Ministria e Shëndetësisë së Maqedonisë së Veriut ka filluar me analizat e rregullta në nivel javor, ku sic njoftohet, çdo të premte do të bëjë publike përqindjen e të vaksinuarve në mesin e personave që kanë rezultuar pozitiv dhe personave që kanë ndërruar jetë nga COVID-19.
Në këtë analizë si të vaksinuar vlerësohen personat që janë injektuar me dy doza dhe që kanë kaluar së paku 14 ditë nga pranimi i dozës së dytë të vaksinës.
Në periudhën nga 06 deri më 12 Gusht në territorin e Maqedonisë së Veriut, 3497 qytetarë kanë rezultuar pozitiv nga testimet. Prej tyre vetëm 12.8% apo 450 qytetarë kanë qenë plotësisht të vaksinuar.
Një përqindje e madhe 87.1% ose 3.047 qytetarë që kanë rezultuar pozitiv me COVID-19 nuk kanë qenë të vaksinuar.
Gjatë kësaj jave, si pasojë e komplikimeve nga COVID-19, kanë ndërruar jetë 25 persona. Asnjëri prej tyre nuk ka qenë i vaksinuar.
Pas paralajmërimeve për ashpërsimin e masave anti-covid pas 16 Gushtit, vihet re një rritje e dukshme e interesimit të qytetarëve për t`u vaksinuar.
Sipas MSH-së gjatë ditës së djeshme janë vaksinuar 15574 qytetarë. Nga fillimi i procesit të imunizimit në vend janë aplikuar mbi 1 milion vaksina kurse me dy doza janë injektuar mbi 462 mijë qytetarë.
