Ish-Kryeministri Sali Berisha ka publikuar në rrjetin social një fotomontazh të Kryeministrit Edi Rama dhe disa prej figurave kryesore të Rilindjes, të akuzuar publikisht nga opozita, por që dalin edhe në përgjimet e anti-mafies si të lidhur me klanet e drogës në vend.
Në foton e publikuar, në një thes që mban mbishkimin “Droga” janë ish-ministrat e Brendshëm, Sajmir Tahiri dhe Fatmir Xhafaj, kryebashkiaku Erion Veliaj, si dhe ish-ministrja e Mbrojtjes, Mimi Kodheli, ndërsa thesi mbahet nga Kryeministri Edi Rama.
Foto e publikuar Berisha e shoqëron me dixhiturën: kreu i narkoshtetit dhe narkoministrat e tij.
Tahiri ndodhet në një proces gjykimi me akuzën e shpërdorimit të detyrës, ndërsa emri i tij ka dalë në përgjimet e grupit të Habilajve.
Fatmir Xhafaj gjithashtu ka pasur akuza për lidhje me trafikantët e drogës. Kujtojmë se vëllai i Xhafajt, Geron Xhafaj, ka qenë i dënuar në Itali pikërisht për trafik droge dhe vijon të vuajë dënimin pasi iu fsheh drejtësisë për vite me rradhë.
Mimi Kodheli është akuzuar për fikjen e radarëve të FA-ve, veprim ky që favorizonte trafikantët e drogës të lëviznin me skafe nga bregdeti shqiptar drejt atij italian.
Erion Veliaj është akuzuar se e ka kthyer Tiranën në një lavatrice të pastrimit të parave të drogës, por edhe të mafies italiane.
