Ish-deputeti i PD-së, Genc Pollo, ka reaguar përmes rrjeteve sociale, lidhur me një postim të Kryeministrit Edi Rama, sipas të cilit Qeveria gjermane mbështet nismën “Ballkani i Hapur”.
Por, Pollo në reagimin e tij, shkruan se Qeveria gjermane mbështet qartazi Tregun e Përbashkët Rajonal (TPR), një produkt i Procesit të Berlinit i nismuar para disa vitesh po nga zonja Merkel.
“TPR nuk ka asnjë lidhje fizike, organike, funksionale apo organizative me Minishengenin e Ballkanin Hapur”, shkruan Pollo.
Duke përdorur ironinë, ish-deputeti thekson se Rama nuk e ka për zor të thotë se qeveria gjermane mbështet Minishengenin, dhe t’i gjejë kështu kopilit të tij një baba të madh e të kamur.
“Ah po! Dy nismat kanë diçka të përbashkët: edhe trojka udhëheqëse e Minishengenit, ashtu si dhe TPR, i referohet katër lirive europiane.
Si t’i thuash tjetrit se meqë foshnja ka dy duar e dy këmbë atëhere është e jotja”, thekson Pollo.
Postimi nga Genc Pollo
Shprehja “ti lësh tjetrit kopilin në derë” nënkupton një veprim të bërë fshehurazi nga dikush dhe që do të shkaktoje më së paku surprizën e të zotit të shtëpisë.
Elementi fshehurazi mungon në deklaratën (cicërimë në twitter) e Edi Ramës se qeveria gjermane përkrahu nismën e tij bashkë me Vuçiçin e Zaevin të riquajtur Ballkan i Hapur (deri dje Minishengeni).
Në fakt deklarata e zotit Seibert, zëdhënës i kancelares Merkel, është qartazi në përkrahje të plotë të Tregut të Përbashkët Rajonal (TPR), një produkt i Procesit të Berlinit i nismuar para disa vitesh po nga zonja Merkel. TPR nuk ka asnjë lidhje fizike, organike, funksionale apo organizative me Minishengenin e Ballkanin Hapur.
Në TPR marrin pjesë të tërë shtetet e Ballkanit Perëndimor përfshi Kosovën. Në Minishengen kemi vetëm trojkën Vuçiç, Zaev e Rama.
E megjithatë Rama nuk e ka për zor të thotë se qeveria gjermane mbështet Minishengenin. Dhe t’i gjejë kështu kopilit të tij një baba të madh e të kamur.
Ah po! Dy nismat kanë diçka të përbashkët: edhe trojka udhëheqëse e Minishengenit, ashtu si dhe TPR, i referohet katër lirive europiane.
Si t’i thuash tjetrit se meqë foshnja ka dy duar e dy këmbë atëhere është e jotja.