“Plani i arratisjes ishte i Pjetrit”, Çekaj: Po të doja, tani do isha duke pirë kafe në Dubai

Gjykata e Tiranës ka dhënë një masë të re sigurie ”arrest me burg” për tre të dënuarit që tentuan arratisjen nga burgu 313 në Tiranë.

Në pretendimet e Arbër Çekaj, që janë siguruar nga Fax News, bosi i kokainës thotë se ai nuk ka dashur që të largohet vetë nga burgu, pasi është kthjelluar për veprimin që po kryente.

Çekaj pretendon se ai ka ndjekur në mënyrë instiktive Fatmir Pjetrin, dhe plani i arratisjes ka qenë i tiji.

“Unë nuk kam goditur asnjë polic, i ndikuar nga gjendja e rënduar psikologjike, për shkak të burgosjes së babait tim, kam ndjekur në mënyrë instiktive Fatmir Pjetrin, kur e pashë duke u larguar. Nuk ka qenë meritë e policisë, ndalimi im, por vetë unë jam kthjelluar se kjo nuk është zgjidhje.

Unë nuk jam kriminel dhe respektoj ligjet e shtetit tim. Po të mos ishte kështu do të isha larguar për në Dubai ose ndonjë shtet tjetër, po të isha kriminel, do të isha duke pirë kafe në kosta rika. Pohoj se ka segmente të shtetit që po punojnë kundër familjes sime.

Jam thjesht viktimë, plani ishte i Fatmirit, këtë e ka pohuar dhe ai vetë. Kam qenë me kafe në dorë, dhe kur e kam parë të largohej e ndoqa nga pas, pa e ditur se ku po shkonte. Kjo është e vërteta e vetme dhe gjithë të tjerat janë spekulime”, ka thënë Çekaj.

LEXO EDHE  Me ar*ë zjarri në makinë, arrestohet 41-vjeçari në Lezhë (Emri)

Arbër Çekaj, Fatmir Pjetri dhe Lulzim Çepele janë akuzuar për dy vepra të reja penale “Tentativë arratisje” dhe “goditje për shkak të detyrës”.

Lulzim Çepele kishte dorën të fashuar gjatë seancës, pasi preu damarët në mënyrë që të tërhiqte vëmendjen e gardianëve, që dy shokët e tij të mund të arratiseshin nga zona e ajrimit.

Gjatë tentativës për t’u larguar, Pjetri ka qëlluar me sende të forta dhe një prej gardianëve të burgut, i cili bëri të mundur dhe dështimin e arratisjes së tyre.

Burimet thonë se Pjetri dhe e ka kërcënuar gardianin e burgut duke i thënë se do t’ia mbante mend fytyrën, dhe duhet të kishte kujdes për familjen e tij.

Nga ana tjetër Çekaj, një prej personave më të kërkuar për disa vite nga drejtësia shqiptare, i ka mohuar vazhdimisht akuzat se ka qenë i përfshirë në trafikun e sasisë rekord prej 613 kilogramë kokainë, që u kap në mesin e bananeve në Durrës.

Ai u konsiderua si peshk i madh nga ambasadori amerikan në Shqipëri Donald Lu.

Çekaj është dënuar me 14 vite burg me vendim të formës së prerë, ndërsa Pjetri është dënuar me 30 vite burg, si autor i disa grabitjeve me dhunë të ndodhura në Tiranë, pjesë e bandës së famshme të babagjyshëve.

Çepele nga ana e tij është dënuar për akuzën e prostitucionit, dhe ka qenë dhe subjekt i OFL-së për sekuestrimin e pasurive të tij.