Dy të dënuarit që tentuan arratisjen me litarë të thurur nga çarçafi, Arbër Çekaj dhe Fatmir Pjetri, kanë dalë sot para Gjykatës së Tiranës për arratisjen që përgatitën, por nuk arritën ta çojnë deri në fund, nga burgu 313.
Dënimeve të tyre tashmë do t’u shtohet edhe tentativa për arratisje dhe goditja e një gardiani.
Ajo që ka tërhequr vëmendjen ishte se Çekaj dhe Pjetri e kishin marrë me të qeshur dhe sportivitet seancën.
I pari në sallë u fut Arbër Çekaj, dhe pas tij u ul Fatmir Pjetri. Duke qenë në një vend ku dukej pak, Çekaj nuk ngurroi ta prezantojë me bujë Pjetrin para mediave, ndërkohë që qeshnin të dy, ndërsa më pas ulet edhe Lulzim Çepele. Ky i fundit ngre dy gishtat lart.
Të tre ata ishin personazhet që tentuan të arratiseshin nga burgu nr.313 në Tiranë duke stisur një vetëvrasje përmes presjes së damarave të Çepeles për të dalë nga qelia gjatë momenteve kur gardianët kujdeseshin për të.
