Ministria e Mbrojtjes njoftoi pas mesnate se një situatë e vështirë nga zjarret u paraqitet në zonën mbi tunelin e Kalimashit, pasi si pasojë e erës që fryu në orët e pasdites, pati përhapje të flakëve në një sipërfaqe më të madhe.
Forcat zjarrfikëse të Kukësit, Shkodrës e Hasit, ndihmuar edhe nga forcat e ardhura nga Kosova u bashkuan për t’i vënë flakët nën kontroll, në mënyrë që të mos depërtojnë në tunel. Ministria e Mbrojtjes u bëri thirrje udhëtarëve të tregojnë kujdes gjatë kalimit në këtë zonë.
Zëri i Amerikës ka publikuar pamjet nga vendi i ngjarjes rreth orës 24:00 duke e konsideruar “zjarr të fuqishëm” atë mbi tunelin e Kalimashit.
Sipas Zërit të Amerikës, “gjatë orëve të natës një zjarr i fuqishëm ka përfshirë gjithë zonën pyjore mbi tunelin e Kalimashit, pjesë e Rrugës së Kombit, që lidh Shqipërinë me Kosovën. Zjarri është përhapur në të dy anët e tunelit, zonë kjo mes Rrëshenit dhe Kukësit.
Zjarri ka nisur që në fillim të javës së kaluar dhe, megjithë ndërhyrjen e forcave zjarrfikëse si dhe atyre të ushtrisë, të mbështetura edhe nga një helikopter, nuk u bë e mundur ndalimi i përhapjes së zjarreve.
Për shkak të situatës kritike, që rrezikon edhe ndërprerjen e qarkullimit rrugor përmes tunelit të Kalimashit, gjatë orëve të mbrëmjes, Presidentja e Kosovës, Vjosa Osmani, ka autorizuar dërgimin e trupave dhe paisjeve të Forcës së Sigurisë së Kosovës në ndihmë të shuarjes së zjarreve në zonën e Kalimashit, në territorin e Shqipërisë.
Ndërkohë, po gjatë mbrëmjes bëhet e ditur se trupat e FSK janë nisur drejt Shqipërisë në ndihmë të operacionit për shuarjen e zjarreve në Kalimash. Ministri i Mbrojtjes i Kosovës, Armend Mehaj, deklaroi se “kam ofruar mbështetjen e plotë me kapacitetet tona në dispozicion për mbështetje të vëllezërve dhe motrave tona në Republikën e Shqipërisë”.
