Kryeministri Edi Rama ka bërë bilancin mbi situatën e zjarreve në vend, ndërsa duket se vijon pushimet.
Përmes rrjeteve sociale, në një situatë të ngjashme si ajo në fillimet e pandemisë, Rama publikon të dhënat në rrjet, ndërkohë që shumë prej homologëve të tij në vende të ndryshme, kanë marrë masa duke shpallur edhe gjendjen e emergjencës për shkak të zjarreve.
Por Kryeministri duket se s´ka ndërmend të heqë dorë nga pushimet dhe duke shfrytëzuar rrjetet sociale, as më shumë dhe as më pak poston deklaratat zyrtare apo informacionet zyrtare të Ministrisë së Mbrojtjes.
Dallimi i vetëm nga qëndrimet e muajve mars-prill 2020, ku u ngujua në kullën e tij në Surrel dhe fliste për pandeminë, është se në atë kohë “Covid-19” e cilësonte një “armik të padukshëm”, ndërsa sot “flet për situatë zjarresh”.
Herën e fundit që Rama u shfaq ishte mbi bordin e një helikopteri ushtarak, të cilin e përdori për të bërë një udhëtim turistik nga jugu në veri, në një kohë kur poshtë në tokë, forcave e ushtrisë, atyre të emergjencave dhe të policisë, u thuhet të merrnin kazma, lopata, sharra, kova me ujë dhe të nisnin luftën me zjarret.
Bilanci i Ramës mbi zjarret
Situata e zjarrit në Dukat është përmirësuar, por puna e forcave operacionale po vijon për mbajtjen nën kontroll të flakëve nga toka.
E vështirë paraqitet situata në fshatin Thirrë, në bashkinë Mirditë, ku zjarri ka përparuar duke u futur në zonë me dendësi pyjore. Aty forcat po punojnë për të ndërprerë vijën e zjarrit në afërsi të rrugës së fshatit. Në varësi të situatës mund të parashikohet edhe ndërhyrje nga ajri.
Vatra e zjarrit në fshatin Munellë-Domgjon, në Fan të Mirditës është izoluar në njërën anë, por ka përhapje në pjesën e sipërme, ku ndërhyrja bëhet e vështirë.
Edhe në Kukës në Majën e Rrunës, ndërhyrja është e vështirë për shkak të terrenit, por situata po mbahet nën kontroll, në mënyrë që të mos ketë përhapje.
Vatra të tjera, të cilat janë nën kontroll janë në luginën e Valbonës, në fshatin Klysyrë, në fshatin Gjorgos të Fierit, ku situata është përmirësuar.
Nuk ka rrezik për banesa dhe po mbahen nën monitorim vatrat; afër Kepit të Rodonit në Durrës, një vatër në fshatin Deshiran në bashkinë e Belshit, ku era po ndërlikon punën e forcave operacionale.
Zjarri në fshatin Treblovë, në bashkinë Selenicë është shuar
Një vatër në terren të vështirë është paraqitur në vendin e quajtur “Varri i Nures”, në kufi midis Përmetit dhe Skraparit në Bejkollarë, por nuk rrezikon përhapjen e flakëve. Po punohet për izolimin e saj.
Punonjësit e zjarrfikëses dhe emergjencave civile po punojnë për të mos lejuar përhapjen e flakëve në zonat e mbrojtura, Parku Kombëtar Bredhi i Hotovës-Dangëlli, në fshatin Bejkollarë, në Gjirokastër.
