Nga Boldnews.al
Nga kodra buzë detit të Jalës, ku gjendet kampi i pushimit të Ministrisë së Mbrojtjes, duken me sy të lirë flakët që përpinë Karaburunin, por edhe tymi i zjarrit që pushtoi zonën e poshtme të Dukatit.
Por, pushuesit e kampit, të gjithë zyrtarë të Mbrojtjes dhe familjarët e tyre, u përfshinë nga një tjetër zjarr mbrëmjen e 4 gushtit 2021.
Të gjithë u ngrohën nga zjarri artistik, të krijuar nga artistët Saimir Braho e Kozma Dushi, ndërkohë që mijëra qytetarë po luftonin me flakët dhe fatin, për të shpëtuar pasurinë dhe gjënë e gjallë.
Në situatën ekstreme të vështirë të motit dhe zjarreve, Ministria e Mbrojtjes është treguar shumë e kujdesshme që të kënaqë pushuesit e saj me këngë dhe muzikë të zgjedhur.
Natyrisht, ky organizim festiv ka një kosto financiare, ndërkohë që punonjësit e Emergjencave Civile u stër-lodhën duke shuar flakët me shkurre dhe mjete rrethanore, në mungesë të investimeve në pajisje për situata të tilla nga ministria e drejtuar nga Niko Peleshi.
“Boldnews.al” ka siguruar një video nga koncerti i mbrëmjes së 4 Gushti në kampin e Ministrisë së Mbrojtjes në Jalë.
Nga pamjet dallohet qartë se personat që po ndjekin koncertin janë tejet të relaksuar, në një kohë që zjarret kanë pushtuar prej shumë ditësh Vlorën, Gjirokastrën dhe zona të tjera të Shqipërisë.
Duket se për Peleshin nuk është shumë e rëndësishme Emergjenca Mjedisore.
Për korçarin Peleshi, të dashuruar pas serenatave, muzika është relaksi më i mirë, pas për flakët mund të mendojë Natyra.
Mjafton të bjerë shi!
