Partizani do të rikthehet në fushat e blerta pas 8 ditësh pushim. Që pas eliminimit nga Liga e Konferencës në dy sfidat kundër Bazelit, të kuqtë morën kohën për të pushuar dhe vetëm sot do të rikthehen në fushën e blertë për të vazhduar me përgatitjet në vigjilje të sezonit të ri.
Stërvitja e parë stërvitore do të zhvillohet në kompleksin “Football Republic”, në orën 20:00 të mbrëmjes.
Për sa i përket merkatos, Partizani është shumë pranë firmës me tre emra dhe pritet që dhe zyrtarizimi i tyre të mos vonojë. Migjen Basha, Redon Mihana dhe Mario Gjata janë emrat që kanë pasur bisedime pozitive me drejtuesit e klubit të kuq, por pritet që të ketë edhe 4-5 afrime të tjera, që Partizani të rivalizojë deri në fund për të dy trofetë.
