Avokati Tom Gashi ka zhvilluar një intervistë për Fax News ku ka folur për iniciativën e “Ballkanit të Hapur”, ose siç njihej deri para pak ditësh si “Mini-Shengeni Ballkanik”.
Tom Gashi deklaroi se Kryeministri Edi Rama po i lëndon shumë kosovarët por edhe shqiptarët me afrimin e tij me Presidentin e Serbisë Aleksandër Vuçiç.
Ai u shpreh se nuk arrin ta kuptojë përse Rama ka këtë lloj debolese për Vuçiç. Gashi shtoi se projekti që ka marrë Rama me Presidentin e Serbisë provokon Kosovën.
“Është e qartë se nuk e di për çfarë arsye e ndërruan emrin. Z.Edi Rama nuk e di përse ka kaq shumë debolesë për Presidentin e Serbisë dhe pse shtyn përpara një projekt që lëndon Kosovën. Kosova ka ende varret e hapura, që presin 1500 trupa të varrosura anembanë Serbisë. Duhet ta dijë Edi Rama se Serbia përveçse vrau rreth 15 mijë civilë gjatë luftës, ajo vrau 1400 fëmijë, rreth 100 ende pa gjetur. Kryen dhunime të grave në Kosovë. Është e paqartë se çfarë po bën Edi Rama. Është duke provokuar Kosovën dhe po shkakton dhimbje të dyfishtë me afërsinë me Serbinë. Open Ballkan do të jetë një projekt i dështuar. Z.Rama e di se Serbia ende nuk e njeh Kosovën. Ideja jonë është të bashkohemi te BE, dhe jo iniciativa të tilla të vogëla që i japin përparësi Serbisë. Ne shqiptarët e Kosovës do të na kthente në punëtorë të tyre”, deklaroi Gashi.
Sipas Gashit, Edi Rama me lëvizjet e tij po tenton të bëhet një lider i Ballkanit, por kjo gjë nuk mund të ndodhë sepse në Ballkan ka shtete të veçanta dhe me histori të ndryshme.
“Tre shtetet mendojnë se mund të bëjnë ç’të duan. Nuk besoj se do të jetë një projekt i realizuar ashtu siç pretendon Edi Rama dhe miku i tij i pandarë Vuçiç, për të cilin i kemi thënë miliona herë që është një kriminel. Ka qenë pjesë e Millosheviçit. Do të jetë një iniciativë që do të harrohet. Nuk do të kemi përfitime ekonomike. Qëllimi i shqiptarëve duhet të jetë BE. Iniciativa të tilla ka pasur në vitin 1946 kur Shqiëpria u dëmtua shumë. Faktikisht dikush kërkon t’ja realizojë dëshirën Serbisë për të pasur qasje në det. Kemi të bëjmë me Serbinë armiqësore. Janë disa çështje që vetëm Edi Rama mund t’i shpjegojë. Ai përpiqet ta paraqesë veten si lider i Ballkanit por kjo gjë nuk mund të ndodhë. Shtetet e Ballkanit janë me histori të ndryshme, janë shtete të veçanta. Ndjejmë dhimbje për jetet e humbura në katër luftërat që shkaktoi Serbia“, deklaroi ai.
