E ndërsa në Shqipëri, Kryeministri Edi Rama shfaqet duke bërë fluturime turistike me helikopter nga jugu në veri, ndërkohë që qindra hektarë pyje dhe kullota janë në pushtetin e flakëve, madje duke djegur edhe banesa apo kasollet e bagëtive, në Maqedoninë e Veriut, Qeveria ka shpallur gjendjen e jashtëzakonshme nga zjarret.
Qeveria e Republikës së Maqedonisë së Veriut ka shpallur gjendje krize për shkak të situatës me zjarret në vend.
Ekzekutivi ka marrë vendim për shpallje të gjendjes së krizës për 30 ditë, në të gjithë territorin e vendit.
Vendimi është marrë pas kërkesës së Komitetit për Koordinim dhe Menaxhim të krizave.
Me shpalljen e gjendjes së krizës, ligji i mundëson qeverisë të shfrytëzojë resurset e organeve të administratës shtetërore, organeve komunale dhe të qytetit të Shkupit, ndërsa me marrëveshje paraprake ose në mënyrë vullnetare mund të shfrytëzohen edhe resurset e qytetarëve, ndërmarrjeve publike dhe shoqërive aksionare.
Nuk dihet nëse Qeveria, që muajt e fundit është drejtuar nga Erion Braçe, do të marrë një vendim të ngjashëm edhe në Shqipëri, por situatat e mëparshme të fatkeqësive natyrore, kanë treguar se Edi Rama më kollaj ka që gjithçka të shkatërrohet se sa të shpallë gjendje të emergjencave.