Blerja e Partizanit, portieri Vokli Laroshi ka zyrtarizuar largimin nga Turbina pas një aventure 2-vjeçare.
19-vjeçari shihet si zëvendësuesi i Alban Hoxhës te ‘’demat e kuq’’ duke bërë një hap të madh në karrierë. Laroshi ishte dhe kapiten i Turbinës teksa në statusin e tij ka falënderuar klubin dhe drejtuesit për vitet e kaluara tek ekipi cërrikas.
Postimi i Vokli Laroshit
Të luaja për qytetin tim ka qenë një ëndërr që në fëmijërinë time! Të nisja karrieren time profesionale dhe të isha kapiten i Turbinës ishte një arritje dhe një vlerësim shumë i madh.
Pas dy sezonesh të mrekullueshme doja t’iu njoftoja se rrugëtimit tim tek Turbina i erdhi fundi.
I jam mirënjohës dhe falenderoj presidentin e klubit, Gentjan Gjoka, kryetarin e bashkisë, Andis Salla, të gjithë trajnerët me të cilët pata fatin të punoj, veçanërisht trajnerin e portierëve, Bledar Malaj për mbështetjen dhe përkrahjen e përhershme! Po ashtu, falenderoj të gjithë punonjësit, nga shefi i klubit deri tek punëtorët e fushës për të gjithë punën e palodhur.
Nuk mund të lë pa përmendur as shokët e ekipit, të cilet u kthyen në familjen time të dytë përgjatë këtyre dy viteve. Në fund por edhe më të rëndësishmit, faleminderit të gjithë ju, tifozëve e përkrahësve që më keni mbeshtetur.
Faleminderit!
