“Error”/ Bllokohet sistemi i Bankës Kombëtare Tregtare. Qytetarët nuk kryejnë veprimet bankare

Një numër i konsiderueshëm qytetarësh raportojnë për probleme me aksesin në sistemin e Bankës Kombëtare Tregtare (BKT) gjatë ditës së Martë (03.08.2021).

Për shkak të një difekti, ende të pasqaruar, klientët nuk kanë arritur të kryejnë veprime bankare, përfshirë transaksione financiare, tërheqje dhe depozitim parash përgjatë të gjithë orarit zyrtar të punës së bankës.

Siç raportohet, jashtë funksionit është sistemi i brendshëm, pra baza e të dhënave që përdoret nga punonjësit e bankës.

Po ashtu, nuk ka qenë në funksion shërbimi i tërheqjes së parave në bankomat dhe as ai “BKT-Smart”, një aplikacion teknologjik që lejon klientët të përdorin shërbimet e internetit për të urdhëruar transaksionet e tyre në filialet e Bankës Kombëtare Tregtare.

Nga të dhënat e mbërritura në redaksi, përdoruesit e shërbimeve të BKT-së, pra si punonjësit, ashtu edhe klientët, janë përballur gjatë të gjithë ditën me sinjalin “Error”, i cili njoftonte për problem në të gjithë veprimtarinë e sistemit.

LEXO EDHE  “Për 3 muaj mësova gomonen në Vlorë”, Davide Pecorelli flet sërish: Bleva gaz për të vrarë veten në makinë por prifti më tha …

Është ende e paqartë se për cilat arsye ka ndodhur ky problem dhe nuk dihet nëse është thjesht një problem teknik apo mund të jetë një rast më serioz.

Klientët e bankës, të cilët kanë përcjellë shqetësimin e tyre pranë “Boldnews.al”, deklarojnë se nuk kanë marrë përgjigje nga punonjësit e BKT-së se përse nuk mund të kryenin veprimet e tyre si në sportele, ashtu edhe në bankomat apo nëpërmjet telefonit.

Problemi raportohet se ka vijuar deri në orët e vona të pasdites të së Martës dhe, të paktën deri në shkrimin e këtij artikulli, nuk ka asnjë sinjal për vendosjen në punë të sistemit.

Banka Kombëtare Tregtare, nga ana e saj, ende nuk ka publikuar asnjë njoftim sqarues për klientët, të cilët janë gjendur në vështirësi në këtë fillim muaji për kryerjen e pagesave të ngutshme, kësteve të kredive apo edhe tërheqjen e pagës, në prag të pushimeve verore. /BN/