Bashkia e Vorës, 7 mln USD për godinën e re pa kryetar dhe mijëra familje në qiell të hapur!

Nga Boldnews.al

Një nga bashkitë pa kryetar është Vora. Në fillim u largua kryetari i zgjedhur Agim Kajmaku, që u kap nga dekriminalizimi. Më pas u drejtua nga dy nënkryetarët, por njëri prej tyre u shkarkua se i kishte dhënë leje vetes për pallat.

Tjetri dhe aktuali, Gentian Picari, njëhërë u pezullua nga Gjykata Administrative, por pas ndërhyrjeve nga lart po e drejton part-time. Por, kjo nuk e ka penguar që të bëjë një nga tenderat më të majmë të rindërtimit të objekteve publike, pas tërmetit të 26 nëntorit 2019. Nuk po ndërton shkolla, kopështe, çerdhe. As spital dhe qendër shëndetësore. Por, do të rindertojë godinën e Bashkisë së Vorës. Po shpenzon plot 7 milionë USD, nga fondet e rindërtimit, për këtë godinë, e cila do të “strehojë” 8 orë 200 punonjës. Po mijëra familje që janë ende në qiell të hapur, përse nuk po i rindërtohen banesat e shkatërruara?!

Faksimile: Njoftimi i tenderit, vlera 618 milionë lekë. Njoftimi i fituesit, 615 milionë lekë, ose 99% e fondit të akorduar

Në muajin maj 2021, Bashkia e Vorës hapi tenderin “e kufizuar në kuadër të procesit të rindërtimit”. Nga keto tenderët e mbyllur që bëhen me mërrëveshje me palët, atje ku për fatkeqësinë po derdhen paratë lumë te një numër i vogël firmash. Objekti i tenderit është “rindërtimi i godinës së Bashkisë Vorë”, me vlerë 618,868,546 lekë pa TVSH. Specifikohej se kohëzgjatja e kontratës ka qenë për 16 muaj, ndërsa në fund firmëtari ishte kryetari i komanduar Gentian Picari.

Ndërkohë, procedurat vijuan dhe në fund të muajit korrik 2021 u bë edhe tenderi. Por, të krahasojmë pak vlerat. Fondi i akorduar ishte 618 milionë lekë rë rinj. Fituesi dha ofertën 615, lekë pa TVSH. pra, vetëm 3 milionë lekë më pak ose sa 99% e fondit limit. Ndërkohë, me TVSH kjo shumë shkon në plot 738 milionë lekë, ose afëraisht 7 milionë USD. Sipas dokumenteve që disponon BoldNeës.al, fitues i këtij tenderi është bashkimi i operatorëve ekonomikë “Egeu Stone”, “Boshnjaku”, “Pezë Vëllezërit”. Goxha shumë për ndërtimin e një godine bashkie. Me këtë fond, ishin ndërtuar dhe rindërtuar të gjitha objektet publike si çerdhe, kopshte, shkolla e madje edhe Qendra Shëndetësore. Por, kjo shumë do të përdoret vetëm për salltanetrat e punonjësve të bashkisë.

LEXO EDHE  Katër rusë misteriozë me çanta në kurriz iu bashkohen serbëve në kufirin e Kosovës

Faksimile: Projekti i godinës së re të Bashkisë Vorë, godinë 6 katëshe që do të kushtojë plot 7 milionë USD

Sipas dokumenteve që disponon BoldNews.al, arsyeja e rindërtimit të godinës së bashkisë është se “godina ekzistuese e Bashkisë Vorë ndodhet në një gjendje jo të mirë për shkak të vjetërsisë dhe amortizimit në vite”. Bashkia shkruan në dokumente se ndërtesa e re do të jetë e përbërë nga 1 kat nëntoke dhe 6 kate mbi tokë. Ndërkohë, vijon se duke pasur parasysh formën e ndërtesës dhe hapësirën në dispozicion, parimi i shpërndarjes është shumë i thjeshtë dhe parashikon praninë e një hapësire bujare hyrje dhe pritje, të lidhur drejtpërdrejt me një sallë / korridor, me shkallët dhe 2 ashensor e vendosur në një pozicion të qartë të dukshëm dhe të arritshëm lehtësisht.

“Në katin perdhe janë të gjitha funksionet e pritjes dhe amiente të tjera ku përfshihen sektori i informimit, zyrat e Aleat, Adisa, protokoll, magazinë, ambient pritje si dhe bar kafe” thuhet në këto dokumente. Pra, edhe një bar kafe brenda bashkisë, ndërsa kërkojnë që godina e re të jetë e sigurtë pasi ” duhet të jetë në gjendje t’i rezistojë goditjeve të tërmetit me një shkallë të duhur sigurie”. Natyrisht, siguria e jetës është kryesore, por a po mendojnë njësoj punonjësit e Bashkisë Vore për mijëra familje që janë ende në qiell të hapur? Përse tenderin për godinën e bashkisë e bën në kohë rekord dhe tenderat për rindërtimin e godinave të shkatërruara po e zvarrisin pambarimisht?! Kujtojmë se deri më tani, Bashkia e Vorës, ka hapur vetëm tenderin për studimin e pallateve të dëmtuara. Për rindërtimin, as që bëhet fjalë!