Prej disa javësh vendi po përballet me situatën e zjarreve, ndërsa ajo që tërheq vëmendjen është fakti se Emergjencat Civile, strukturë e cila në situata të tilla duhej të ishte tërësisht e angazhuar, nuk gjendet askund.
Dhe duket se për të mbuluar apatinë e Emergjencave Civile, ministri i Mbrojtjes, Niko Peleshi, dhe Kryeministri Edi Rama, kanë nisur show dhe propagandën. Me një regji dhe skenar të ngjashme si në rastin e përmbytjeve apo tërmetit, Rama dhe ministrat e tij, po e kalojnë emergjencën e zjarreve sërisht me propagandë.
Drejtori i Emergjencave Civile, Haki Çako, që duhet të ishte në ballë të situatës, ka zgjedhur të marrë pushimet. Por jo vetëm kaq, ai ka penguar ose thënë ndryshe i ka mbyllur derën edhe KLSH-së, institucion që bazuar në ligj, auditon institucionet shtetërore.
Mungesa e Çakos që ka bërë që auditi i Kontrollit të Lartë të Shtetit pranë Emergjencave Civile të bllokohet.
Gazetarja Anila Hoxha raporton se grupi i auditit pasi ka mbërritur për të kryer kontrollet pranë emergjencave, është përballur me deklarimet e specialistëve, që i kanë pohuar grupit të kontrollit se drejtori i Emergjencave është me pushime dhe nuk mund të lejojnë askënd për të kontrolluar se përse emergjencat nuk po funksionojnë në këtë situatë zjarresh.
Anila Hoxha komunikoi me kryetarin e Kontrollit të Lartë të Shtetit, Arben Shehun, i cili e konfirmoi situatën e pazakontë.
“I bëj thirrje publikisht drejtorit të emergjencave civile të kthehet urgjent në detyrë për të zbatuar detyrimet që ka sipas ligjit, me situatën kur disa zona të vendit janë pushtuar nga zjarret. E dyta të mos bëhet pengesë për auditimin e Kontrollit të Lartë të Shtetit. Është e vërtetë që është komunikuar se nuk mund të jepet asnjë informacion derisa të kthehet drejtori i emergjencave”, tha Shehu.
Duket se e gjithë kjo situatë e Emergjencave Civile shpjegon edhe propogadën e Ramës, Peleshit dhe çdo zyrtari tjetër të Rilindjes, përmes të cilës po tentohet të mbulohet një skandal.
