Shqipëria në zjarr, Hakiu i Emergjencave Civile “shkëlqen” me mungesën e tij

Nga Boldnews.al

Qindra hektarë gjelbërim në katër anët e Shqipërisë janë përfshirë nga flakët këto ditë të nxehta, ndërkohë që forcat e mbrojtjes civile nuk kanë arritur të tregojnë efikasitet në përballimin e situatës.

Pa mjetet e duhura dhe vetëm me vullnetin e tyre pozitiv, njerëzit që po përballen me zjarret masive janë braktisur edhe nga Drejtori i Përgjithshëm i Emergjencave Civile, Haki Çako.

Shefi i Emergjencave, personi që duhet të kishte një plan gati për përballimin e zjarreve të verës, prej shumë ditësh nuk është parë publikisht dhe nuk ka dhënë asnjë direktivë, të paktën publike, për të menaxhuar sa më mirë situatën.

Dhe, rezultati është me të vërtetë shqetësuar-qindra hektarë pyje dhe shkurre të larta në Vlorë, Gjirokastër, Kavajë, Mamurras e në zona të tjera, tashmë janë shndërruar në tym dhe pluhur hiri.

Ndërsa, sa për Haki Çakon, burime nga Ministria e Mbrojtjes deklarojnë se është me pushime verore, të cilat janë parashikuar të përfundojnë në javën e dytë të Gushtit.

Çako ka zgjedhur të luajë rolin e krye-familjarit të mirë këto ditë vere, ndërkohë që qindra familje shqiptare janë nën kërcënimin e flakëve, të cilat duhet të menaxhohen dhe shuhen nga strukturat e Emergjencave Civile në varësi të tij.

LEXO EDHE  Krimi që tronditi Divjakën, familja Rrasa në kushte ekstreme të varfërisë, apeli i djalit

Zjarret e shkaktuara nga të nxehtit e kësaj vere dëshmuan edhe njëherë se autoritetet shqiptare janë tërësisht të papërgatitura për përballimin e situatave problematike natyrore.

Punonjësit e emergjencave civile u detyruan të gërmonin me duar nën rrënojat e godinave të rrënuara nga tërmeti i 26 Nëntorit 2019, pasi drejtuesit e tyre, përfshirë edhe Haki Çakon, nuk kishin arritur t’u siguronin mjetet minimale të kërkim-shpëtimit.

E njëjta situatë po përsëritet tashmë edhe me zjarret e Korrikut. Trupat e emergjencave civile nuk kanë sërish mjetet minimale për të përballuar flakët e përhapura në dhjetra hektarë.

Ndoshta, për këtë arsye, edhe Haki Çako ka vendosur të mos ndërpresë pushimet e verës.

Prania e tij, jo vetëm që nuk do të përmirësojë situatën, por, me shumë mundësi, do t’i nxjerrë bojën propagandës qeveritare për “masat e marra në përballimin e flakëve”.