Galatasaray bëhet gati t’i japë lamtumirën Radamel Falkaos. Drejtuesit e klubit i kanë bërë të ditur sulmuesit kolumbian se duhet të kërkojë një skuadër të re, ashtu si Sofian Feghuli. Klubi është gati të largojë dy lojtarët, për t’i bërë vend një futbollisti i cili ëndërron që shumë shpejt të zbresë në fushë me fanellën e Shqipërisë, Nedim Bajrami.
Presidenti i Gallatasarajit, Burak Elmas, ka bërë të ditur se klubi nuk mund të përballojë më rrogat e dy lojtarëve për shkak të krizës financiare si edhe faktit se dëmtimet i kanë lënë për një periudhë të gjatë jashtë fushe. Ndaj u ka komunikuar të dy futbollistëve që të gjejnë sistemim tjetër, edhe pse kanë edhe një vit të mbetur në kontratat e tyre.
Me kursimin nga rrogat e tyre, klubi kërkon të përforcohet me lojtarë më të rinj dhe i pari në listën e dëshirave të Fatih Terim është Nedim Bajrami. Në ditët e fundit raportohet se ka patur kontakte të vazhdueshme me Empolin për futbollistin shqiptar i cili nuk është kundër këtij transferimi. Gallatasaraj kërkon që ta marrë atë në huazim me të drejtë blerje, ndërsa Empoli insiston në shitjën e kartonit të tij për rreth 6 milionë euro.
