Nga Boldnews.al
Pak ditë më parë, BoldNews.al publikoi një investigim se kryetari i Bashkisë së Fierit, Armando Subashi, kishte hapur një tender 200 mijë euro për rrugët e inceneratorit. Por, disa ditë më pas, ai u tërhoq, teksa shkruante se i ka kërkuar Ministrisë së Mjedisit dhe Transporteve se kush autoritet duhet t’i ndërtojë rrugët; koncesionari apo Bashkia Fier? Më pas, në mënyrë të beftë, qyteti i Fierit u mbulua nga hije të mëdha tymi të shkaktuar nga djegia e mbeturinave në landfillin egzistues, në hyrje të qytetit.
Një landfill jashtë çdo parametri mjedisor. Me të drejtë, pas kësaj ndodhije, lindën shumë pyetje: kush ia vuri zjarrin këtij landfilli? Kush kompani do të përfitojë nga kjo ngjarje? A ka gisht Bashkia e Fierit? Dhe, kur kaluan disa ditë, plehrat e qytetit të Fierit kanë filluar që të dërgohen në incenetatorin në fshatin Verri? A ka pasur interes ky incenerator për këtë situatë? Mjafton një hetim i thjeshtë nga SPAK-u dhe do të zbardhen të gjitha prapaskenat. Në fakt, SPAK-u ka filluar verifikimet pas denoncimit të deputetit të zgjedhur Petro Koçit, i cili denoncoi se mafia ishte pas tenderave në Fier. A ishte tenderi 200 mijë eurosh një nga aludimet e Petro Koçit? Apo e ka pasur për një tjetër procedurë të majme që ishte hapur me kohë, tenderin 2 milionë euro të pastrimit të Njësive Administrative të Fierit?
Sipas dokumenteve që disponon BoldNews.al, Bashkia e Fierit ka bërë një njoftim në Agjencinë e Prokurimit Publik ku njofton se ka anuluar procedurën e pastrimit të Njësive Administrative. Bëhet fjalë për procedurën e hapur me mjete elektronike, me objekt të kontratës “shërbimi i pastrimit dhe largimit të mbeturinave (mbetjeve urbane) në Njësitë Administrative dhe kryerja e shërbimit të mirëmbajtjes së varrezave publike në Njësitë Administrative të Bashkisë Fier”. Fondi për këtë tender është 198 984 172 lekë, ose me TVSH mbi 2 milionë euro. Në dokumentin që ka siguruar BoldNews.al, Bashkia e Fierit ka njoftuar edhe arsyet e anulimit.
“Kjo procedurë prokurimi publik anulohet bazuar në vendimin e Këshillit Bashkiak Fier nr.50 datë 23.07.2021 “Për miratimin e vazhdimit të kryerjes së shërbimit të pastrimit dhe largimit të mbeturinave në Njësitë Administrative dhe kryerjen e shërbimit të mirëmbajtjes së varrezave publike në Njësitë Administrative të Bashkisë Fier, me Ndërmarrrjen e Pastrim-Gjelbërimit të Bashkisë Fier”, me anë të së cilit është vendosur anulimi i kësaj procedure prokurimi dhe miratimi i kryerjes së shërbimit të pastrimit dhe largimit të mbeturinave (mbetjeve urbane) në Njësitë Administrative dhe kryerja e shërbimit të mirëmbajtjes së varrezave publike në Njësitë Administrative të Bashkisë Fier, me Ndërmarrrjen e Pastrim-Gjelbërimit të Bashkisë Fier” thuhet në këtë dokument.
Një tëheqje e shpejtë e Subashit, të cilin e ka zënë frika pas denoncimit të Petro Koçit apo edhe të arrestimit të Fatos Tushes, ish-kryetarit të Bashkisë së Lushnjes. Një sinjal i qartë se ky tender i majmë ishte i destinuar për firma që qendrojnë afër Subashit apo Bashkisë së Fierit.
