Flakët në Karaburun rrezikojnë të presin banesat e Dukatit Fushë. Gjatë orëve të natës ka pasur një përkeqësim të situatës në zonë, çka ka detyruar edhe administratën Rajonale të Zonave të Mbrojtura Vlorë (AdZM), që përmes rrjeteve sociale, të njoftojë se më e rrezikuara është lagjia “Kanal”, të cilës flakët i janë afruar së tepërmi.
Për situatën janë lajmëruar forcat zjarrfikëse dhe ata po qëndrojnë në gatishmëri për të ndërhyrë ndaj çdo rreziku të mudshëm, sipas AdZM Vlorë.
Ndërkohë, iu është bërë thirrje edhe banorëve të ruajnë vigjilencën dhe të jenë në gatishmëri për çdo skenar të mundshëm në lidhje me kërcënimin nga flakët.
Njoftimi i Administratës Rajonale të Zonave të Mbrojtura Vlorë:
Zjarri në Karaburun po rrezikon të përparojë në drejtim të zonave të banuara në Dukat Fushë, pranë lagjes “Kanal”.
Forcat e zjarrëfikses janë sinjalizuar tashmë për të qenë në gadishmëri , por njëkohësisht lutemi banorëve të jenë vigjilentë dhe në gadishmëri!