Një 27-vjeçare shqiptare, nënë e dy fëmijëve, është gjetur e vrarë brenda në makine, në zonën e St. Petersburg në SHBA.
Trupi i pajetë i nënës së dy fëmijëve të mitur, u gjet brenda makinës së saj pranë Kopshtit Memorial ‘Woodlawn’ në Shën Petersburg rreth orës 17:30 të së shtunës.
E reja, e identifikuar si Joana Peca, është ekzekutuar në sy të fëmijëve të saj.
Fëmijët ishin të ulur në sediljen e pasme të makinës dhe fatmirësisht nuk janë lënduar, por e kanë parë skenën me sytë e tyre.
Policia ende nuk e ka identifikuar autorin e ngjarjes, ndërsa kërkon ndihmën e komunitetit për të mësuar më shumë mbi viktimën. Ndërkohë, ngjarja është publikuar nga disa media lokale në SHBA.
Oficeri i policisë, që e gjeti të vdekur shqiptaren, u shpreh: “Dy fëmijë të vegjël sonte do të shkojnë në shtrat pa nënën e tyre. Sa herë që kemi fëmijë, jeta e të cilëve është prekur nga dhuna në këtë mënyrë, ne i kërkojmë komunitetit që të lutemi së bashku dhe t’i ndihmojmë ata”.
Kur oficerët mbërritën, ata e gjetën 27-vjeçaren të vdekur brenda një makine nga një plagë e dukshme me armë zjarri, ndërkohë që dy fëmijët e saj, ishin të padëmtuar, por të tmerruar.
Aktualisht policia vazhdon të hetojë të dyshuarit e mundshëm për krimin e rëndë që i mori jetën shqiptares. Policia iu ka bërë thirrje gjithashtu qytetarëve që të raportojnë nëse kanë të dhëna mbi ketë ngjarje.
Shqiptarja kishte emigruar prej kohësh për një jetë më të mirë në SHBA, ku ishte vendosur në Florida.