“Trualli te Teatri, Erion Braçe i pari që do shkojë në SPAK”, paralajmërimi i aktivistes

Qeveria shqiptare vendosi që truallin ku ka qenë Teatri Kombëtar, t’ia kalojë në pronësi Bashkisë së Tiranës, për ndërtimin e objektit të ri.

Sipas VKM-së të bërë publike sot, të firmosur nga zv. kryeministri Erion Braçe, Bashkisë së Tiranës i ndalohet të ndryshojë destinacionin e pasurisë së përcaktuar në vendim, ta tjetërsojë atë apo t’ua japë të tretëve në përdorim.

Ndërkohë, për këtë lajm ka reaguar dhe Aleanca për Teatrin.

Përmes përfaqësueses së tyre, Adriana Kalaja, e cila është shprehur se ky është vërtet një lajm tepër i trishtë dhe një vendim, të cilin e kanë pritur me shumë shqetësim gjatë gjithë këtyre ditëve.

Ajo vijon më tej teksa shprehet se ky është një vendim i marrë nga disa banditë, të cilët kanë marrë peng të gjitha institucionet shqiptare, ndërsa nuk nguroi të sulmojë edhe opozitën, e cila duket se ka zgjedhur të heshtë deri tani për këtë vendim të qeverisë.

LEXO EDHE  Koronavirusi/ Alimehmeti: Piku i valës ka kaluar, ‘Delta’ po thyhet

“Ky është një lajm tepër i trishtë, të cilin e kemi pritur me shumë shqetësim këto ditë. Ky vendim është marrë nga disa banditë, të cilët kanë merr peng çdo gjë në këtë vend, çdo institucion shqiptar dhe dita-ditës na e tregojnë me karshillëk që bëjnë ç’të duan me ligjin dhe me Shqipërinë. Habitem nga mënyra pasive se si e pret opozita këtë shkelje të rëndë të Kushtetutës dhe ligjit”, u shpreh ndër të tjera Adriana Kalaja.

Kalaja tha po ashtu se do të padisë në SPAK zv.kryeministrin Erion Braçe, firmën e të cilit mban VKM-ja e kaluar dje në Këshillin e Ministrave.

“I pari është Erion Braçe. Por do të çojmë gjithë drejtuesit e institucioneve që kanë qenë pjesë e padisë në Gjykatën Kushtetuese. Kryeministrin, ministren e Financave, të Kulturës dhe Kryetarin e Bashkisë”, tha Kalaja ndër të tjera mesditën e sotme.