Autoritetet italiane të Guardia di Finanza të Barit kanë ekzekutuar operacionin që ka çuar në shkatërrimin e një skeme kriminale që pajiste me dokumenta false emigrantë që kërkonin leje qëndrimi në Itali.
Me urdhër të Prokurorisë së Foggias është ekzekutuar urdhër denoncimi ndaj 269 shtetasve ekstrakomunitarë mes të cilëve janë dhe 5 shqiptarë.
Gjithashtu është ekzekutuar urdhëri i arrestimit për krerët e organizimit të kësaj skeme kriminale.
Pas kësaj skeme kriminale fshihej një shoqatë jo fitimprurëse Onlus, me bazë në rajonin e Puglias e që kishte si qëllim promovimin e intergrimit social e asistencë ndaj emigrantëve.
Kundrejt shumës 400 deri në 800 euro, kjo shoqatë lëshonte kontrata pune e dokumenta banese false duke i dhënë kështu mundësi emigrantëve të pajiseshin me leje qëndrimi të rregullt apo ta rinovonin lejen e skaduar.
Kontratat e punës false i kryenin në bashkëpunim me pronarë që në shkëmbim të parave pranonin punësimin fiktiv të emigrantit.
Shumica e pronarëve ishin persona me precedent penale e të lidhur me botën e krimit puliez.
Të njëjtën metodë përdornin dhe për pronarët e banesave që lëshonin dokumenta qiraja fiktive për emigrantë kundrejt marrjes së një shume parash.
Nga 269 emigrantë të denoncuar, RTV Ora mëson se ka 5 shqiptarë e se shoqata jo fitim prurëse Onlus drejtohet nga një emigrant nga Kameruni e me banim në Puglia.
Ndër 269 emigrantët e denoncuar, 254 kanë komunikuar tek autoritetet italiane si kontratë pune false ashtu dhe kontratë qiraje banese false.
Të gjithë emigrantët e denoncuar mes të ciëlve dhe 5 shqiptarë janë sinjalizuar në Zyrën Kombëtare të Emigracionit me kërkesën e tërheqjes së lejes së qëndrimit.
Sipas Financës italiane, shoqata Onlus ka përfituar rreth 200 mijë euro nga ky aktivitet i paligjshëm
