Ambasadorja amerikane ka bërë të njohur publikisht të premten se qeveria amerikane kërkon që udhëheqja e PD-ë të largojë Sali Berishën nga grupi parlamentar demokrat dhe të distancohet prej tij.
Një burim diplomatik i ka pohuar Exit News se kjo kërkesë i është bërë kryetarit të PD-së para shumë javësh, menjëherë pasi Berishës iu ndalua hyrja në ShBA nga Sektetari amerikan i shtetit. Është një kërkesë që Bashës i është përsëritur qartë në çdo takim me ambasadoren Kim.
Burimet diplomatike i kanë pohuar Exit se Basha u ka pranuar amerikanëve se e kupton se Berisha duhet të largohet por duke shpjeguar vështirësinë që ai ka për të marrë këtë vendim ka kërkuar kohë që të gjejë një mënyrë të butë për ta arritur këtë gjë.
Por diplomatët amerikanë i kanë bërë të ditur Bashës se cështja nuk mund të zgjatet dhe nëse ai nuk do ta linte Berishën jashtë grupit demokrat parlamentar, qeveria amerikane do të fliste hapur kundër tij dhe udhëheqjes së PD-së.
Kështu, drama e PD-së u shty për në fillim të shtatorit: ose PD do përjashtonte Berishën, ose SHBA do të “përjashtonte” PD-në.
Por duket se durimi i amerikanëve mori goditje nga Kuvendi i PD-së, gjatë se cilit ndodhën dy gjëra: Kuvendi jo vetëm nuk e preku por as nuk tregoi vetëdije për ekzistencën e “çështjes”, nderkohë që në hapje të Kuvendit, Berisha dhe Basha u takuan dhe folën përzëmërsisht dhe të qeshur me njëri-tjetrin.
Kjo ndodhi u interpretua nga diplomatët amerikanë si shenjë se Basha ishte tërhequr nga ideja e përjashtimit të Berishës nga grupi parlamentar.
Në këto kushte, ambasadorja amerikane duket se vendosi që ta bëjë publike kërkesën e qeverisë amerikane për përjashtimin e Berishës.
Është e paqartë nëse bërja publike e kësaj kërkesë është rritje e trysnisë ndaj Lulzim Bashës, apo një veprim i kërkuar nga Basha për t’i dhënë atij argumentin për të cilin ai ka aq shumë nevojë që t’ja veshë cdo gjë presionit amerikan: ‘nuk kemi çfarë t’i bëjmë amerikanëve, e patë vetë që na kanë vënë një ultimatum që nuk mund ta injorojmë’.
Tani që kartat janë të gjitha mbi tavolinë, Lulzim Basha as nuk mund të bëjë gjysëm zgjedhje dhe as nuk mund ta vonojë zgjedhje: në shtator ai do të zgjedhë mes SHBA-ve e komunitetit ndërkombëtar nga njëra anë dhe Berishës dhe mbështetësve të tij nga ana tjetër.
Cfarëdo zgjedhje të bëjë Basha, ajo gjë do të ndryshojë rrënjësisht PD-në.
Nëse do të zgjedhë Berishë, Basha dhe PD do të izolohen nga faktori ndërkombëtar, i cili do të vazhdojë të mbështesë Ramën përballë Bashës.
Fakti është se PD ka disa vjet që është thuajse e izoluar nga komuniteti ndërkombëtar—sa për shkak të vendimeve të saj ekstreme politike dhe futjes së vendit në disa kriza politike, aq edhe për shkak të paaftësisë të vazhdueshme të PD-së për të krijuar marrëdhënie bashkëpunimi dhe besimi me komunitetin ndërkombëtar.
Kjo alternativë mbart edhe rrezikun që komuniteti ndërkombëtar mund të mbështesë apo investohet në alternativa të reja politike për të rritur konkurencën dhe zbehur peshën e PD-së në elektorat.
Por nga ana tjetër, përjashtimi i Berishës do të jetë gjithashtu goditje e rëndë personale për Bashën brenda PD-së. Një pjesë e anëtarësisë dhe ndoshta edhe disa fiura drejtuese do të dalin hapur ndaj veprimit të Bashës duke shtuar zhgënjimin ndaj Bashës brenda PD-së dhe gërryer ndjeshëm bazën votuese të PD-së, veçanërisht në afat-shkurtër.
Kjo lloj çarje do të përforcohet edhe nga një fakt tjetër: Bashës do t’i duhet që për të përzënë Berishën të promovojë në kryesinë e PD-së dhe në role drejtuese persona të caktuar brenda PD-së, investim personal i Bashës, të cilët janë ndër të paktët të gatshëm të kërkojnë e mbrojnë në publik përzënien e Berishës nga grupi parlamentar.
Por disa prej këtyre personave gëzojnë antipati në rradhët e demokratëve dhe promovimi i tyre do të krijojë pakënaqësi dhe çarje të tjera brenda PD-së çfarë do të gërryejë edhe më shumë bazën e votuesve të PD-së.
Është ironike që Basha ja doli t’i bindë demokratët se edhe pse humbi ai duhet të mos largohet se mund t’i udhëheqë demokratët drejt fitores, tani duhet t’i bindë demokratët se vetëm largimi i Berishës i çon demokratët drejt fitores./Exit.al
