Gjashtë persona janë arrestuar nga policia e Shkodrës, që ka sekuestruar lëndë narkotike kanabis, 1 armë zjarri dhe municion. Mes të arrestuarve janë dhe dy vajza të reja.
Burime zyrtare nga blutë bënë me dije se operacioni i koduar “Gimaj” u realizua nga strukturat e Seksionit Kundër Trafiqeve të Paligjshme dhe Narkotikëve të DVP Shkodër, në bashkëpunim me Komisariatin e Policisë Shkodër, Forcat e Posaçme “Shqiponja” dhe Njësinë Operacionale të DVP Shkodër, bazuar në informacionet e marra në rrugë operative.
Si rezultat i këtij operacioni, u arrestuan në flagrancë: Gjokë Foleta, 56 vjeç, Pal Alia, 23 vjeç, Besnik Rripa., 22 vjeç, D. Q., 17 vjeç, Manjola Kroni, 22 vjeçe dhe Eugena Gjelaj, 24 vjeçe. Gjithashtu janë shpallur në kërkim E.Gj. dhe Rr.Rr..
“Këta shtetas, në bashkëpunim me njëri-tjetrin, kishin kultivuar bimë narkotike në një zonë malore të pyllëzuar të fshati Gimaj, Shkodër. Gjatë kontrollit është gjetur një sasi lënde narkotike cannabis sativa dhe një armë zjarri automatike me 2 krehër me fishekë. Në cilësinë e provës materiale janë sekuestruar lënda narkotike, arma e zjarrit, krehrat me fishekë dhe 7 aparate celular”, njoftoi policia.
Ndaj të arrestuarve rëndojnë akuzat për veprat penale ”Prodhimi dhe shitja e narkotikëve”, ”Kultivimi i bimëve narkotike”, “Mbajtja pa leje e armëve dhe municionit” dhe ”Pastrim i produkteve të veprës penale”.
