Një shtetas polak është arrestuar nga policia për veprat penale “Përdorimi i dokumenteve të falsifikuara” dhe “Falsifikimi i vulave, stampave ose i formularëve”.
Fillimisht, ai u ndalua pasi po lëvizte me një automjet tip “Ferrari” me shpejtësi mbi kufirin maksimal të lejuar.
“Në Bypass-in e Fierit, shërbimet e Policisë Rrugore kanë konstatuar nëpërmjet radarit automjetin tip ‘Ferrari’ me targa gjermane, që drejtohej me shpejtësi 231 km/h, nga shtetasi T S., 50 vjeç, nga Polonia. Nga verifikimet e kryera në bashkëpunim me Interpolin ka rezultuar se ky automjet është i shpallur në kërkim në Gjermani, për mungesë siguracioni. Gjithashtu, leja e drejtimit që ky shtetas i paraqiti punonjësve të Policisë, ishte e falsifikuar. Në vijim të veprimeve, nga specialistët e Seksionit për Hetimin e Krimit Ekonomik e Financiar në DVP Fier u bë arrestimi në flagrancë i shtetasit T.S., për veprat penale ‘Përdorimi i dokumenteve të falsifikuara’ dhe ‘Falsifikimi i vulave, stampave ose i formularëve’. Për këtë shtetas u vendos edhe masa administrative 80.000 lekë të rinj, për tejkalim të normave të shpejtësisë dhe mungesë siguracioni”, njoftoi policia.
Automjeti tip “Ferrari” u sekuestrua në cilësinë e provës materiale, shtuan të njëjtat burime.
