Një shqiptar, i cili ka bashkëpunuar me autoritetet spanjolle, ka ndihmuar në goditjen me sukses të një grupi kriminal që vepronte në Spanjë dhe që kishte si veprimtari të tij kultivimin dhe shpërndarjen e lëndës narkotike.
Grupi prej gjashtë anëtarësh, gjithashtu dyshohen se kanë mbajtur peng shqiptarin, në një vilë në zonën e Valencias.
Mediat spanjolle raportojnë se shqiptari ka treguar se si arriti të arratisej nga rrëmbimi i tyre dhe të njoftonte autoritetet. Ai gjithashtu ka pohuar se krahas tij, në atë vilë mbahej e torturohej edhe një shtetas tjetër.
Pas kësaj dëshmie efektivët nisën menjëherë lëvizjet, duke ushtruar kontrolle në vilën në fjalë. Ato gjetën aty një person të torturuar e dhunuar e që mbahej i lidhur në një karrige.
Në atë vilë, agjentët gjithashtu kanë gjetur edhe plantacione kanabisi dhe sasi të paketuara, gati për shitje.
Anëtarët e bandës, tashmë të arrestuar akuzohen për një sërë veprash penale, duke nisur nga organizata kriminale, kultivimi dhe trafikimi i drogës si dhe abuzim me energjinë elektrike.
