Tritan Shehu, deputeti i zgjedhur i qarkut Gjirokastër i Partisë Demokratike, shprehet se Shqipëria po përballet aktualisht me një regjim dhe një regjim mund të mposhtet vetëm me përballje të fortë në terren, duke vënë në lëvizje të madhe qytetarët.
“Mendoj se kjo analizë ka një armë të madhe në dorë, sepse ka raportin e OSBE-ODIHR. Unë mendoj se analiza duhet të fokusohet me përgatitjen e strukturave për ballafaqimin e shpejtë e të fortë që ne duhet t ëbëjmë në të gjitha institucionet, sallat, sheshet, për ta përmbysur këtë regjim. Ky regjim përmbyset vetëm me një lëvizje të madhe të popullatës. Mendoj se produkti i këtij kongresi ishte pozitiv sepse kërkoi hapje të partisë. Burimet e forta njerëzore që mbështetet PD, të cilat përbëjnë padyshim një nga bërthamat më të rëndësishme për rezistencën e fortë që do të bëjmë në javët që vijnë. Duhet të jemi të qartë të vendosur të fortë, rezistencë përballë këtij regjimi në javët që vijnë. Nuk është e lehtë, por është një përballje e paevitueshme, e domosdoshme për të shpëtuar Shqipërinë nga humnera. Për të përmbysur këtë regjim kërkohet një ortek i madh njerëzor. Sa më të fortë të tregohemi në terren, aq më shumë do të kemi respektin e partnerëve”, tha Shehu në një intervistë për Faxnews.
Duke folur mbi raportin final të OSBE-ODIHR për zgjedhjet parlamentare të 25 prillit, Tritan Shehu theksoi se raporti nuk kishte ndonjë gjë të re nga denoncimet që PD ka bërë vazhdimisht.
“Po të marresh kolonat kryesore të këtij raporti janë ato që ne kemi thënë. Janë ato që thuhen për shitblerjen e votës, janë ato që thuhen për përdorimin masiv të administratës zgjedhore. Janë ato që thuhen për përdorimin e aseteve publike. Janë ato që thuhen për shkeljen e marrëveshjeve mes partive. Flitet edhe për Covid dhe keqpërdorimin e masave për votat. Për të vazhduar më tej me kanabisin e vendit. Janë në përgjithësi ato për të cilat ne kemi bërtitur çdo ditë. Ata e shprehën në këtë gjuhë, sepse është gjuha që flasin ata. Fakti që e ngriti si problem OSBE-ODIHR, kjo tregon se është serioze. Mos prisni që raporti të thotë se zgjedhjet nuk ishin me përputhje me demokracinë. Konkluzionet ligjore i bëjnë ata, ndërsa konkluzionet politike i bëjnë shqiptarët dhe partitë shqiptare. Raporti i ODIHR jep një indicie. Më pas duhet reagim nga organet për të parë shkeljet dhe më pas partitë politike. Nuk është çështja vetëm te papunësia, varfëria, por te rruga që do të marri Shqipëria. A do të shkojë drejt perëndimit apo drejt autokracive lindore”, u shpreh Shehu.
Tritan Shehu refuzoi ta quante raportin e OSBE-ODIHR një fitore për opozitën. Ai tha më tepër se fitore për opozitën, ky raport është një disfatë e thellë për demokracinë në Shqipërinë.
“Dikush mund të thotë se është fitore për opozitën, por kjo është një disfatë e thellë për demokracinë shqipte. Deformohet vota e lirë e shqiptarëve. Një tregim i qartë i realitetit të hidhur sot në Shqipëri. Deformime të tilla të demokracisë nuk mund të bëjnë të mundur integrimin europian të Shqipërisë. Rezultati i shpallur zyrtarisht i procesit të votimit nuk është ai në përputhje me dëshirën e shqiptarëve”, tha Shehu.
