Sekretari për Çështjet Zgjedhore në PD, Ivi Kaso, komentoi gjetjet e raportit final të OSBE/ODIHR për zgjedhjet e 25 prillit, që sipas tij konfirmon denoncimet e opozitës për parregullsi dhe shitblerje votash.
“Raporti nuk sjell asnjë habi për shqiptarët, por konfirmon atë që PD ka thënë përpara ditës së zgjedhjeve, nga momenti që për gjatë gjithë fushatës ka denoncuar abuzime të shumta, për fenomene të rënda si shitblerja e votave dhe abuzimi me mjetet e aparatit shtetëror, kur ky në mënyrë të paligjshme vihet në dispozicion të një partie politike”, thotë Kaso për A2cnn.
Por ku qëndron rëndësia e raportit?
“Në momentin që flet arbitri ndërkombëtar, që nuk mund të etiketohet si humbësi që krijon alibi, denoncimet tona marrin dimension tjetër, ai shihet si udhërrëfyes për institucionet shqiptare por edhe për agjencitë ligjzbatuese të cilave ju janë referuar rastet, dhe që tashmë kanë material të bollshëm”, thotë ai.
Sipas Kasos, “PD po përballet me një makineri që po perfeksionohet për keq, siç tregon raporti i fundit që shrehet me gjuhën nga më të ashprat në 2 dekadat e fundit. Nuk ka shqiptar që të kujtojë raporte të ODIHR që të vënë në dyshim standardet minimale për një proces zgjedhor të pranueshëm, madje edhe për elementin bazik të votës sekrete”.
Për drejtuesin demokrat, përballja e opozitës do të jetë shumëplanëshe. “E gjithë beteja jonë, që në vitet e fundit është zhvilluar jashtë parlamentit, do të rikthehet në Kuvend me një plan të qartë prioritetesh dhe betejash për t’u bërë, brenda dhe jashtë tij”.
Por përpara, sipas Kasos, në PD do “vihet gishti në plagë” , për të kuptuar çfarë nuk ka shkuar mirë në aksionin opozitar. “Procesi i reflektimit është vazhdues, filloi me Këshillin Kombëtar dhe rikonfirmimin e Bashës, vijon me zgjedhjet e kryesisë së partisë, do të vazhdojë me degët”.
Për sa i përket zhvillimeve brenda partisë në Korçë, ku pjesë e anëtarësisë dhe drejtuesve lokalë dhanë dorëheqjen në shenjë proteste ndaj lidershipit, Kaso mendon se “thirrjet e sotme më duken më shumë si thirrje për reflektim, do të kishin vlerë po të ishin marrë me seriozitetin e duhur, që të kthehej në diçka të shëndoshë”.
“Është një qark shumë i rëndësishëm për ne, mendonin që elektorati aty do të shumëfishohej, dhe jo të shkonin në drejtim të kundërt”, theksoi Kaso.
