Një person është proceduar penalisht pasi në Kapshticë i janë gjetur rreth 25.000 euro në makinë. Sipas policisë, paratë ishin të padeklaruara.
“Shërbimet e Stacionit të Policisë Kufitare Kapshticë në bashkëpunim me autoritetet doganore, kanë kaluar në vijën e dytë, për kontroll të imtësishëm automjetin tip ‘Opel’ me drejtues shtetasin J.D., 67 vjeç, banues në fshatin Shegas, Lushnjë. Gjatë kontrollit të ushtruar në mjetin e tij, në një çantë, iu gjetën e sekuestruan në cilësinë e provës materiale 24.530 euro, sasi të cilën ky shtetas nuk e kishte deklaruar”, njoftoi policia.
“Veprimet e mëtejshme u kryen nga specialistët për Hetimin e Krimit Ekonomik-Financiar, në Drejtorinë Vendore të Policisë Korçë, të cilët filluan procedimin penal ndaj këtij shtetasi për veprën penale ‘Mosdeklarimi në kufi i të hollave’“, shtuan të njëjtat burime.
Materialet i kaluan Prokurorisë pranë Gjykatës së Shkallës së Parë Korçë, njoftoi më tej policia.
