Të shtëna me armë zjarri janë shënuar në vazhdën e një konflikti në fshatin Adriatik të Kurbinit. Nuk raportohet për persona të lënduar, ndërkohë, autori është arrestuar.
Ngjarja
“Shërbimet e Komisariatit të Policisë Kurbin, pas një telefonate në Sallën Operative, se në fshatin Adriatik, një shtetas po qëllonte me armë zjarri, menjëherë kanë shkuar në adresën e dhënë, duke parandaluar ngjarjen e mundshme kriminale. Punonjësit e Policisë kanë bërë të mundur neutralizimin dhe prangosjen e shtetasit D.Gj., i cili për motive të dobëta ka kanosur shtetasit P.N. dhe V.N. (bashkëshortë), banues në Adriatik, Kurbin, duke gjuajtur në ajër me armë zjarri automatik, në afërsi të banesës së tyre”, bënë me dije këtë të Hënë burime zyrtare nga uniformat blu.
Në vijim të veprimeve, nga specialistët për Hetimin e Krimeve në Komisariatin e Policisë Kurbin u arrestua në flagrancë shtetasi D.Gj., 23 vjeç, banues në Lezhë, ndërsa u sekuestrua në cilësinë e provës materiale arma e zjarrit automatik me një krehër me 24 fishekë, shtuan të njëjtat burime.
Ndaj të arrestuarit rëndojnë akuzat për veprat penale “Mbajtja pa leje e armëve dhe municionit luftarak” dhe “Kanosja”.
DENONCO