Unioni i Gazetarëve ka reaguar lidhur me incidentin e ndodhur në zonën e njohur si Varri i bamit në Tiranë, ku nga forcat speciale të Policisë, u dhunua gazetari Ergys Gjençaj.
Përmes një deklarate, Unioni i Gazetarëve thekson se imazhi i sjelljes policore i fiksuar nga kamera e televizionit “News 24” me reporterin Ergys Gjençaj, në mesditen e dates 27 Korrik 2021, ndërsa po raportonte live një operacion policie në vendin e quajtur Varri i Bamit, në Tiranë, përbën një incident të rëndë.
“Është akt i pastër i një dhunimi fizik mbi reporterin dhe arrogancë policore. Këtij episodi i është shtuar edhe shoqërimi për gati një orë i reporterit Gjençaj.
Unioni i Gazetarëve Shqiptarë denoncon ashpër këtë akt dhunues dhe brutalitetin policor të demonstruar ndaj reporterit dhe kërkon vënien para përgjegjësise së punonjesve me uniformë policie, të cilët janë aktorë të kësaj dhune dhe arrogance mbi gazetarin në detyrë
UGSH u bën thirrje autoriteteve policore në vend të reflektojne me urgjence ndaj incidenteve të tilla, të ushtrojne autoritetin e tyre për respektimin e integritetit dhe prezencës profesionale të gazetarëve në terren dhe në mjedisin e tyre raportues.
Episode të tilla të njohura si në Lezhë, në Fier, Tiranë,. etj., janë raste dëshmuese pse në raportet e fundit ndërkombëtare për lirinë e medias dhe të gazetarit, vendi yne njeh rënie në nivelet e indeksimit dhe shenjohet për probleme serioze”, thuhet në reagimin e UGSH.
