Dhuna e policisë ndaj gazetarit dhe heshtja e turpshme e Veliut, Çuçit e shoqatave të gazetarëve

Një incident i rëndë ka ndodhur në mes të ditës në Tiranë, ku së paku 6 apo 7 pjesëtarë të forcave speciale të policisë, pasi dështuan në një operacion, kanë dhunuar një gazetar.

Bëhet fjalë për gazetarin Ergys Gjençaj, ndaj të cilit efektivët e policisë, vepruan si të ishte ai objektivi që arriti t´i shpëtonte, dhe jo një punonjës i medias që nga automjeti i televizionit ku punon, tentoi të kapte disa momente nga aksioni policor.

Nëse policët do të kishin ndaluar objektivin e tyre, atëherë me siguri pak minuta më pas do të shfaqeshin drejtuesit e policisë për të paraqitur me pamje filmike suksesin.

Me siguri do të shfaqej edhe Bled Çuçi apo Ardi Veliu, do të jepej edhe një njoftim me detaje mbi atë se çfarë kishin bërë operacionalet e Tiranës, apo forcat RENEA.

Në fakt ata dështuan dhe gjithë inatin, e akumuluar nga paaftësia për të përmbushur detyrën e nxorën ndaj një gazetari, ndoshta ndër të paktit me aq shumë vite eksperiencë që vijon të ndjekë lajmin apo zhvillimin në terren.

LEXO EDHE  Shkup/ Arrestohet 62-vjeçari pasi vrau nënën e tij me thikë

Lidhur me incidentin, që më shumë i ngjante një skene rrëmbimi, se sa një operacioni policor, hesht Drejtoria e Përgjithshme e Policisë, hesht kryepolici Ardi Veliu, hesht edhe ministri Bledi Çuçi, hesht edhe SHÇBA, dhe fatkeqësisht heshtin edhe shoqatat e gazetarëve, me emra që nisin nga Unioni te Lidhja.

Heshtin të gjithë a thua se nuk ka ndodhur asgjë, kur minimalisht që në momentin e parë kur u shfaqën pamjet duhet të kishte një reagim edhe formal, sikur incidenti do të hetohej, apo të shprehej një distancim nga veprimet e atyre policëve.

Ndoshta Ardi Veliut dhe kupolës së Policisë mund t´i duket shumë normale një sjellje e tillë e disa punonjësve të paaftë për të ndalur objektivin e operacionit, Bledi Çuçi mund të jetë me pushime, dhe SHÇBA ndoshta nuk e sheh të arsyeshme reagimin, por për shoqatat e gazetarëve është e pafalshme dhe e turpshme që në mes të ditës, një prej gazetarëve më me përvojë dhunohet dhe ata heshtin.