Kreu demokrat Lulzim Basha u shpreh se beteja për rikthimin e normalitetit në vend do të zhvillohet nga opozita brenda dhe jashtë Kuvendit.
Basha iu shmang një tjetër pyetjeje, nëse kjo do të thotë se opozita do të protestojë ose jo, pra do t´i rikthehet protestave, por shtoi se detyrat janë të qarta.
“Detyrat tona janë të qarta, sikundër detyra e drejtësisë është e qartë, duhet të hetojë krimet zgjedhore. Ne nuk stepemi për të përmbushur detyrat tona ndaj demokracisë dhe shqiptarëve”, tha Basha.
Kreu demokrat nuk pohoi, por as mohoi, nëse opozita do të rikthehet te protestat, por shtoi se kjo është një betejë jo e lehtë, kur ka përballv një regjim që po mban përdhunshëm pushtetin.
Basha tha se PD do të jetë në krah të qytetarëve dhe ashtu sikundër ka deklaruar më parë do të jetë e hapur ndaj çdo grupii aktiv në shoqërinë shqiptare.
“Tjetërsimi i vullnetit të qytetarëve është një dramë dhe këtë tjetërsim e ka bërë Edi Rama me bashkëpunëtorët e tij, si në fushën e krimit të organizuar, ashtu edhe në atë politik apo ekonomik”, tha Basha.
