Pesë persona, të cilët u kapën në tentativë për të vjedhur në një banesë në Elbasan, u arrestuan. Policia njoftoi këtë të Hënë se grupi ka kryer edhe 4 vjedhje në banesa dhe lokale.
“Nga shërbimet e Komisariatit të Policisë Elbasan, bazuar mbi informacionet e marra në rrugë operative se disa shtetas po tentonin të vidhnin në një banesë në lagjen ‘Emin Matraxhiu’ në Elbasan, u organizua dhe u finalizua më sukses operacioni policor i koduar ‘Banesa e fundit’. Si rezultat i këtij operacioni u bë e mundur kapja dhe arrestimi në flagrancë i shtetasve: L. Ll., 33 vjeç, B. M., 19 vjeç, I. T., 19 vjeç, E. B. 18 vjeç dhe B. Rr., 18 vjeç, banues në Elbasan”, njoftoi policia.
Sipas të njëjtave burime: Këta shtetas janë kapur në flagrancë, në mesnatë, në tentativë për të vjedhur në banesën e shtetasit P.S., në lagjen “Emin Matraxhiu”.
Nga veprimet e kryera, rezulton se këta shtetas dyshohen se janë autorë edhe të disa vjedhjeve të tjera të ndodhura më parë.
Në cilësinë e provës materiale u sekuestrua një automjet në pronësi të shtetasit B.Rr., me të cilin këta shtetas kryenin vjedhjet, si dhe një mjet prerës thikë.
Ata akuzohen për veprat penale “Vjedhja”, kryer në bashkëpunim dhe “Mbajtja pa leje e armëve të ftohta”.
