Në Shqipëri numërohen 272 raste aktive me Covid-19, 103 prej të cilëve janë në Tiranë.
Lajm i mirë është se gjatë pothuajse 1 muaji nuk raportohen zyrtarisht viktima të shkaktuara nga koronavirusi, ndërsa numri i të shtruarve në spitalin infektiv është 8-të.
Ministria e Shëndetësisë në buletinet ditore lidhur me situatën epidemiologjike në vend nuk jep të dhëna nëse varianti Delta i Covid-19 ka hyrë ose jo në Shqipëri, edhe pse ka dyshime të forta, se ky variant po qarkullon, në kushtet kur të gjithë ata që hyjnë në territorin shqiptar, shqiptarë apo të huaj, nuk kanë një kontroll në pikat e kalimit kufitar, nuk janë të detyruar të paraqesin teste PCR, sikundër ndodh me shqiptarët që udhëtojnë drejt shumë vendeve, apo certifikata vaksinimi.
Bazuar në të dhënat zyrtare të Ministrisë së Shëndetësisë qarqet më të prekura bazuar në numrin e rasteve aktive janë Tirana me 103, më pas vijnë Vlora dhe Elbasani me nga 26 raste, dhe në vendin e katërt renditet Kukësi me 25 raste, nga të cilat sipas informacioneve 23 janë vetëm në Has.
Por bazuar në numrin e popullsisë së qarqeve apo bashkive, duket se Hasi është rajoni më i prekur me 23 raste aktive, ndërsa më pak i prekuri është Gjirokastra me 1 rast të vetëm dhe më pas Korça, që numëron 6 raste aktive, bazuar në të dhënat zyrtare të raportuara nga Ministria e Shëndetësisë.
Po çfarë ka ndodhur në Has që pati një shpërthim rastesh të Covid-19 dhe a ka lidhje kjo me variantin Delta?
Zyrtarisht thuhet se ISHP nuk ka marrë ende përgjigjet nga laboratorët në Gjermani për dyshimet që prej javësh janë ngritur lidhur me qarkullimin e këtij mutacioni të Covid edhe në Shqipëri. Por bazuar në faktin se qarku i Kukësit ka një lidhje të fortë me Britaninë e Madhe, atje ku shumë shqiptarë kanë emigruar në vitet e fundit, dhe referuar informacioneve se Delta ka një shtrirje të gjerë në Britani, nuk përjashtohet mundësia që një prej emigrantëve që mund të ketë ardhur në Shqipëri, ku mungojnë kontrollet në pikat e kalimit kufitar, të ketë qenë mbartës i virusit, duke shkaktuar edhe përhapjen e tij në këtë Has.
Gjithsesi këto mbesin vetëm dyshime, përsa kohë institucionet shqiptare të shëndetësisë, edhe pas 1 muaji, nuk mund të japin një përgjigje zyrtare nëse në Shqipëri qarkullon apo jo varianti Delta.
