“Duart e krimit janë shtrirë mbi financat publike”, SPAK thërret për të dëshmuar Petro Koçin

SPAK ka thirrur për të dëshmuar deputetin e zgjedhur nga radhët e Partisë Socialiste, Petro Koçi, pas deklaratave të këtij të fundit në rrjetet sociale.

Nga raportimet mësohet se deputeti Koçi pritet të paraqitet në zyrat e SPAK, ditën e hënë, më 26 korrik, ndërkohë që sot u raportua se hetuesit kanë shkuar në zyrat e Bashkisë së Fierit për të verifikuar disa dosje që kanë të bëjnv me tenderat.

SPAK hapi një çështje pas deklaratave të deputetit të zgjedhur, i cili i bëri thirrje Prokurorisë të shkojë në Fier dhe të hetojë financat publike, pasi sipas tij, tenderat po fitohen nga trafikantët.

“Efektet e SPAK dhe të Reformës në Drejtësi po japin rezultat. Bota e krimit dhe të korruptuarit kanë filluar të ndjejnë frikë nga ligji.

LEXO EDHE  Ironia e fortë e Bushatit: Rama duhet të jetë në sallë në prezantimin e ‘Tepsisë 3’, të dimë ku do vjedhë më shumë

Këto efekte i mirëpresim edhe në Fier ku duart e krimit janë shtrirë mbi financat publike. Protagonistë të trafikut të drogës dhe të dhunës tashmë kanë legalizuar subjekte biznesi që fitojnë tendera publike.

Këtë e realizojnë ose nëpërmjet lidhjeve të drejtpërdrejta me ndonjë titullar institucionesh ose nëpërmjet kërcënimit të zyrtarëve të caktuar që ekzekutojnë prokurimet si edhe nëpërmjet eliminimit të konkurrentëve në procesin e tenderimit duke kërcënuar pronarët e subjekteve të biznesit.

Të fuqizuar sidomos duke larë paratë e pista në industrinë e ndërtimit ata vazhdojnë të përvetësojnë fitime kolosale nga taksat tona.

Organet ligjzbatuese nuk duhet të lejojnë që qyteti ynë t’i nënshtrohet botës së krimit të organizuar”, shkruante Koçi në rrjetet sociale.