Në javët e fundit ka pasur një shtim të rasteve me Covid-19 në Shqipëri, ndonëse zyrtarisht nga autoritetet shëndetësore nuk ka informacione zyrtare nëse në vend qarkullon apo jo varianti “Delta”.
Gjatë kësaj jave, bazuar në informacionet zyrtare, harta e rasteve aktive me Covid-19 është përhapur në 11 bashki, ku natyrisht Tirana mbetet me numrin më të lartë të pacientëve aktivë.
Nëse më 4 korrik në Shqipëri u regjistrua vetëm 1 rast i ri me Covid gjatë 24 orëve dhe rastet aktive zbritën në 52 të shpërndarë në 8 qarqe, të enjten numri i bashkive arriti në 11, me pothuajse një 4 fishim të rasteve.
Tirana vijon të mbajë numrin më të lartë të rasteve aktive, ku 40 % e rasteve janë në kryeqytet, e ndjekur nga Vlora me 11 % të rasteve, Durrësi dhe Kukësi me 9 %, Elbasani me 7.8 % të rasteve , Shkodër dhe Lezhë me 6% të rasteve aktive dhe fieri me 5 %.
Në Shqipëri janë mbi 230 raste pozitiv aktive.
Ekspertët e institutit të shëndetit publik rritjen e rasteve ia atribuojnë dyshimeve të qarkullimit të variantit delta i cili përhapet shumë më shpejt dhe që prek kryesisht të rinjtë. Gjithsesi autoritetet shprehen se shtimi i rasteve ka lidhje edhe me minimizimin e kufizimeve, si dhe ardhjen në Shqipëri të turistëve, pa iu nënshtruar ndonjë testimi në kufi apo masa të tjera kufizuese. E vetmja masë kufizuese është ajo pas orës 00:00, si dhe ndalimi i muzikës në orën 23:00.
DENONCO