Gjyqet në arbitrazh, Open Data: Shqipëria, rreth 447 mln euro për t´u paguar

Shqiptarët do të duhet të paguajnë edhe 300 milionë euro, më shumë nga sa thotë qeveria, për humbjen e gjyqeve të shtetit ndaj privative, kosto që në total përllogaritet rreth 447 milionë euro. Çështjet që janë në proces përbëjnë shqetësim për buxhetin e shtetit, pasi vetëm nga gjyqi për “Parkun Fotovoltaik” në Akërni kërkohen 110 milionë Euro dëmshpërblim.

Fatura e detyrimeve të arbitrazhit e raportuar nga Ministria e Financave kap vlerën e 109.5 milionë eurove por disa çështje të tjera të hapura në gjykatën ndërkombëtare rrezikojnë të sjellin kosto shtesë për buxhetin e shtetit nëse vendimi përfundimtar shkon në favor të palës paditëse.

LEXO EDHE  Bulqizë/ Bie në kontakt me rrymën elektrike, vdes një person

Sipas të dhënave të përpunuara nga “Open Data” detyrimet mund të shtohen me rreth 300 milionë euro duke e çuar kështu totalin në rreth 447 milionë euro.

Vetëm gjatë vitit të kaluar janë regjistruar pranë Qendrës Ndërkombëtare për Zgjidhjen e Mosmarrëveshjeve të Investimeve 3 çështje dhe fatura me e lartë lidhet me ndërtimin e “Parkut Fotovoltaik në Akërni.

Open Data raporton se kjo çështje ka nisur në Dhjetor të vitit 2020 nga kompania Arka Energy B.V, e cila ishte pjesëmarrëse në konsorciumin e shpallur fituese përmes një procedure tenderi ndërkombëtare, nga Ministria e Infrastrukturës dhe Energjisë.