Teksa kryeministri Edi Rama e trumbetoi si sukses ligjin e ri për prokurimet publike, për ish-ministrin e Drejtësisë Ylli Manjani, hartuesit e ligjit duhet të futen në burg.
“Nxirrini njerëzit nga burgu se rrinë kot aty! Po të keni këllqe, Futni në burg ata që kanë bërë këtë ligj të MOS Prokurimit Publik”, shkruan ish-ministri në një reagimet në rrjetet sociale. “Shiheni se si harxhohen paratë e buxhetit pa tender, pa garë. Të gjitha shkeljet e tenderave të sotëm tashmë janë legalizar… Edhe kur behet ndonjë procedurë, kontratat janë afatgjata, njësoj si te koncensionet… Aty ku kërkohet vlerësim konkret fjalitë në ligj fillojnë me ‘mund të…’ Vlerësimi i fituesit është subjektiv…”, shton ai.
“Ndërkohë, sa për informacion, ata që bëjnë procedurën e vlerësimit të atyre pak firmave që marrin pjesë në ato pak gara, nuk janë përgjegjës as për hartimin e kërkesave të tenderit e as përgjegjës për lidhjen dhe zbatimin e kontratave. Nuk kanë qenë as me ligjin e vjetër…”, përfundon Manjani.
Në komentet e regimit, Manjani shton se ligji është i thjeshtë për çdo fitues pa garë, por abuziv ndaj “cilitdo që i bie të bëjë ushtrinë, dmth burgun”…
Avokatja Enida Bozheku shprehet se ky ligj është aq i komplikuar në detaje sa diskrecioni i përzgjedhjes është aq i larte dhe mundësia për korrupsion permanente. Sipas saj, tipologjitë kontraktore ishin instrumente perfektë abuzimi. “Në prokurimet me garë, afatet dhe sasia dokumentale dukej sikur ishte ndërtuar apostafat për garues të paracaktuar”, shton më tej, duke e cilësuar ligjin “klientelist dhe aspak gjithëpërfshirës”.
